Identidá Astur

El Xanu´l Caborniu ye un blogue de referencia pal nacionalismu asturianu de magar cuasi entamara la blogosfera astur. Independencia de criteriu y bon rexistru de la so prosa, son notes bultables de so.

Por embargu dellos cuidamos que nun yera necesario, en temes históricos, gastar tantes veces la pallabra "cuadonguismu" talo como´l so autor, al que-y tamos tan agradecíos, neto como una triba de signu cauterizador, como profilácticu. Nun hai nada malo en pensar qu´España y Europa naciera en Cuadonga. En Cuadonga nació´l Reinu d´Asturies, sí, pero tamién podemos dicer qu´ehí tuvo nacencia España y Europa. o al menos una Renacencia. Europa naciera espiritualmente colos cantos de La Ilíada. Y España, la España hispanogoda renaciera nos montes asturcántabros.

Los fechos son los fechos y esti ye´l signu baxo´l que ñaz la identidá astur en 722. D´otra banda, yá entrando na tema del que s´ocupa un post caberu d´El Xanu, paeznos que nel bandolerismu de la nobleza astur del medieuvu nun habría que ver episodios "independentistes" avant la lettre. Más acordies cola nuesa idnetidá ta´l fechu de que los conceyos pidieran al Rei (castiellán) proteición y derechu al hermanamientu (Xunta Xeneral) énte munchos d´esos nobles depredadores.http://elxanulcaborniu.blogspot.com.es/…/lobispu-pelayu-yal…

Una institución cimera que punxo los finxos de Les Asturies fue la Xunta Xeneral del Principáu, cristalizada al rodiu d´esti mesmu ente, el Principáu, que dellos desnortiaos consideren humildante pero qu´a nós paeznos más bien una bendición, por cuanto nació pa protexer al Pueblu Astur (hermanáu en conceyos) de los depredadores de la nobleza. Eso, y la fundación de Poles (villes d´iniciativa real) por cuenta monarques que, sí, yeran castiellanos pero que se consideraben heriedos de Pelayo, heriedos de la Monarquía Astur. Un saludu al Xanu´l Caborniu, y una felicitación pol so llabor. Pero tamién un encamentamientu a nun perder de vista la realidá histórica.