Nunca nun se supo nidiamente qué cosa fuera l´"asturianismu", na midida na que nun yera un nacionalismu asturianu. Asturianismu no cultural o "soberanismu" no político, tantu da. Ye la mesma puxarra ideolóxica que yá daba boquiaes dende los últimos 30 años. Agora certificamos la so defunción una y bones ametiéronse bayura d´asturianistes autotitualos na Sucursal podemista.
Como formaciones esclusivamente asturianes namái queden Andecha Astur, siempres en peligru de cayer pela pindia cuesta del "comunismu soberanista" (velequí la creación de "Conceyu Abiertu" y les ambigüedaes al respetive de ser un alter ego d´Andecha) y Foro Asturias, incapaz de decantase nidiamente pol rexonalismu y la oficialidá.
Apurrimos dellos escritos d´interés recién sobre la defunción y podemización del asturianismu.
Artículu d'opición de Marcos A. Fernández n'InfoAsturies:
En Madrid yá dieron permisu pa presentar les diferentes marques blanques con que presentar a Podemos a les elleiciones de mayu, y n’Asturies yá entamaron cola marca municipalista, y faenlo presentándose comu una “alternativa asturiana” cuandu oxetivamente nun son más que la espresión d’una franquicia n’espansión gracies a un ésitu ellectoral y mediáticu con epicentru en Madrid.
Dicho esto, y comu nun podía ser d’otra miente, ye d’agradecer cualisquier movimientu qu’aide a remover los cimientos del chiringu que tienen entamao n’Asturies los políticos del réxime, y por más qu’ente los cabezaleros d’esa “Asturies que ñaz” apaezan “vieyes cares” implicaes en mayor o menor midía colos estremaos gobiernos del PSOE-IU, siempres ye positivu cualisquier cambiu que los ponga del nuesu llau nel procesu de normalización democrática tovía por facer nel nuesu país.
Ye nidio qu’esta franquicia vese favorecía poles dificultaes del nacionalismu asturianu p’articular una alternativa política qu’illusione a la sociedá asturiana y con capacidá pa rentabilizar istitucionalmente los sos importantes avances sociales y políticos. Pero yelo muncho más que Podemos y les marques blanques que puean creyar n’Asturies, nun son el resultáu d’un procesu d’acumulación militante dende un trabayu de base, sinon consecuencia de la sobroesposición mediática de Podemos y n’especial de Pablo Iglesias, presentándolos comu referencia pal enfadu social.
El resultáu elleutoral de la franquicia, con ún o otru nome, apunta bien mentes sigan cuntando col sofitu mediáticu, otra cosa sedrá cuandu tean que baxar a tierra. En cualisquier casu Andecha Astur siempres tará dimpuesta a collaborar con quien se comprometa col cambiu, ensin seutarismos que nun lleven a dengún llau, pero siempres dende la soberanía nacional asturiana y ensin dexamos atochecer pol soníu del xiblateru d’Hamelin.
Marcos A. Fdez ye miembru de la Xunta Executiva d'Andecha Astur.
Les declaraciones de David Ripa despreciando la llingua asturiana y de la Secretaria Xeneral de Podemos en Gozón, ente otros, defendiendo la unidá d’España y faltando al respetu a asturianos y catalanes son cenciellamente inaceutables.
Arturu X. Bermeyu, secretariu Xeneral d’Andecha Astur, afirma que “nun esperaba esti españolismu dende Podemos”, afirmando que “perriba del calter sucursal de la formación madrilana n’Asturies, la prosimidá en plantegamientos políticos y sociales, nun facía esperar un comportamientu tan españolista, con declaraciones de cabezaleros d´esta formación nes que nun respeten la identidá llingüística asturiana y lleguen a ponemos a los asturianos comu referentes de la unidá d’España, faltando al respetu non solo al Pueblu Asturianu sinon tamién al Catalán.
Respeutu a la propuesta d’IAS d’una “unidá popular” con IU y Podemos, Arturu X. Bermeyu esclarió qu’ensin presllar denguna puerte, Andecha Astur ye una formación nacionaliega que defende la soberanía del Pueblu Asturianu, y que per ende nun-y paez probatible participar en proyeutos estatalistes, muncho menos con formaciones comu IU cuya implicación colos estremaos gobiernos del PSOE n’Asturies y los ayuntamientos asturianos failos direutamente responsables de la situación política qu’anguañu carecemos n’Asturies, por nun falar de los casos de corrupción direutamente lligaos a los gobiernos d’Areces.
(Carlos X. Blanco) Blog Nacionalismu Asturianu
El baturiciu de les idees al rodiu de quién ye nacionalista y quién non va aselando colos comportamientos y les palabres de della xente. Yá escampla la nublina.
Hebo tiempos, non tan llonxanos, nos que valía too. Queríen danos a comer gatu, o aguarón, siendo la ufierta, empara, la d´una esporpoyante y lliebre. Pero la única lliebre qu´acolumbremos fue la que salió escopetá dende les files d´una supuesta “izquierda asturianista”.Salió a escape, a toa mecha, haza l´abelugu y puestín de fabes fariñoses de “Podemos”.
Podemos, l´heriedu de los quincemayistes, la utopía bien financiada dende l´estranxeru y sofitada pola gran empresa mediática.
Podemos que promete, a un becariu al que nun-y renovaron la beca pa siguir zucando, una especie d´utopía universalizadora. Facer de toos nós, becarios. Tovía conocí a xente d´Izquierda Unida que quería imponer, vía revolucionaria, un “proletariáu universal”: El que nun trabayara que nun comiera. Pero la mutación nel ADN d´aquella arcaica izquierda yá riza´l rizu. Envede Proletariáu Universal quieren un Rentista Universal.
La Renta Universal, agora Básica. Los Daniel Ripa y los Podemistas becarios y precarios tán dimpuestos a nun mandar más curricula, nin madrugar, nin estudiar oposiciones. Una beca o pensión pa toos, y puntu. Y viva España. Que yá los mantendrán los represores, esos que paguen impuestos, claro que sí, hom. Esa ye la “filosofía” de la “Primavera Española”. Tan rellumante como l´otru inventu que los maravió, la “Primavera Árabe”. Espero que menos sangrina, anquen un lo teo claro.
El Sr. Ripa, y los demás podemistes, tán dimpuestos a mandar la Llingua al Museu de los Folclores. Pa elli, aragonés d´orix, al paecer, eso del bable ta guapo pa los turistes. Igual podía ponese dalgún lletrerín nos váteres, pa qu´un señor de Jaca o Móstoles, o Moratalaz o Vitigudino, o de ca dios dia “¡Mira, Homes, como n´inglés, ja, ja!"
El Sr. Ripa diz que nun tien qu´haber imposición del asturianu oficializáu sobre´l castellán. Nun lo dixo un cavernícola d´UPD o DNAES, del PPSOE, nun lo dixo la vieya guardia roxa del PCE, nun lo dixo un Obiespu Foriatu o un xoven yá pervieyu discípulu de Gustavo Bueno. Díxolo namenos qu´un líder asturianu de la formación qu´aconceyó a bien d´asturianistes y que reclutó a un garrapiellín de falsos nacionalistes, y qu´acoyó nel son sen (nunca sabremos satamente en qué situación formal) a Compromisu por Asturies, supuestos validores del asturianu, supuesta coalición de nacionalistes d´izquierda.
Un puestín prometíu por aciu del puxu mediáticu, pol enclín populista d´esti Reinu (o Sultanatu) Borbónicu que-y dicen “España”, bien paga la pena. Y si hai que sacrificar “la cosa del bable”, adóptase el discursu vieyu y a tirar milles. ¿El Bable? Diz Ripa, ¡ya falaremos d´eses xigomencies!
Les lliebres corrieron porque fai fríu na marxinalidá y na minoría. Defender unes señes d´identidá astur, riba too, la llingua, ye daqué prescindible si de lo que se trata ye de que-y acuten al politiquín un puestín. Eso sí, lluchemos porque esti Reinu salga del Euro, escaeza los compromisos internacionales, y construya´l paraísu bolivarianu diseñáu polos becarios ensin renovación, los llicenciaos en paro que nun se formaron debidamente, los “investigadores”. Tou dios en Podemos ye “llicenciáu” y doctor burris causa. Esto yá paez México, onde un fontaneru ye “inxenieru n´instalaciones hidráuliques doméstiques”.
¿Qué pecáu cometió Asturies pa tener esta triba de políticos, o de naguantes y aspirantes a selo?
Quiero copiar el cachu de la entrevista referida al asturiano y a la so oficialidá, y que nun se piense que toi desaxerando o inventado, col enllazu que-y correspuende:
“Esto es diferente a como sería en Cataluña”. Claro, Sr. Ripa. Claro que ye diferente. Inda la Sra. Alicia Sánchez-Camacho o la estrema derecha fala en catalán a los sos electores. En Cataluña, un charnegu que pide votos a los catalanes usa la llingua catalana al empar de la española, y trátala con respetu. Equí, Sr. Ripa, viennos cualquiera de casadiós, un cazurru venga d´au venga, y diznos a los nativos lo que tenemos que facer coles coses de nuestro. Tien garrada la midida a los asturianos, Sr. Podemos. Calónos abondo. Va llegar llonxe, perllonxe.
Falar la llingua pa los turistes, pa que se diviertan. Y nunca, nunca IMPONER nada a los castellanofalantes. Na situación asimétrica actual esto ye como si un elefante s´atopara con una formiga metanes la caleya y aquél-y dixera a la prubitina: “Vete con procuru, nun vayas a máncame”.
¿Nacionalistes en Podemos? Andái en bona hora. A rascala y alón. ¿Asturianistes posibilistes en Podemos? Lleváislo claro. O sois bobos o queréis facenos bobos a los demás ¿Postures clares en materia llingüística y identitaria? La mesma esquierda xacobina , fata y faltona, prepotente y xesuita, que podía xurdir en Parla, Tomelloso o Vallecas. Esa…Pa ellos. A gorrazos con ellos y a lo nuestro.
Asturies, esconsona. Y a gorrazos.
Comunicáu de l´asociación N´Ast.
Queremos recorda-y a esta formación política que la oficialidá del asturianu ye un drechu democráticu y qu’ensin ella nun va haber cambiu que valga
Dende l’Asociación Cultural N’Ast queremos facer públicu’l nuesu esmolecimientu poles declaraciones que, selmana tres selmana, vienen faciendo los cabezaleros de Podemos al rodiu la llingua asturiana. Y ye que determinaes postures públiques déxenmos plasmaos, más cuando vienen d’una formación política que, supuestamente, lleva naguando dende’l so aniciu por un cambiu sociopolíticu basáu, ente otres coses, nel fondu respetu a los drechos fundamentales de los y les ciudadanes, ente los que s’alcuentren, necesariamente, los sos drechos llingüísticos.
Asina, vemos qu’estes postures van dende’l más absolutu de los escaezos (nel pasáu “Manifestamientu pol Cambiu” del 31 de xineru en Madrid los cabezaleros de Podemos saludaren a los presentes en toles llingües del Estáu menos n’asturianu) al más absolutu de los desprecios (camentando que les llingües del Estáu, ente elles l’asturianu, son un factor qu’atenta escontra la xunidá d’España, sigún afitó Mª Eugenia Suárez, Secretaria Xeneral de Podemos en Gozón) pasando por una visión puramente folclorista más propia d’otres dómines, poniendo al asturianu como dalgo que-y presta ver a los turistes que vienen equí, “como la gaita” (que ye la que nel so intre amosó Daniel Ripa, candidatu de la corriente Somos Asturies a la Secretaría Xeneral de Podemos n’Asturies).
Mesmamente, nuna entrevista concedía a un diariu asturianu nel día d’ayeri, Tania González –eurodiputada asturiana y, por tanto, cargu públicu de Podemos– afitó, entrugada pola postura d’esta formación política énte la llingua asturiana, que na organización “nun hai una postura oficial, pero ye fundamental abrir l’alderique ente la ciudadanía asturiano, lo que nunca nun se fexo, pa saber lo que realmente pensamos los asturianos”. Declaraciones que mos dexen ablucaos, nun sólo porque a estes altures en Podemos tovía nun heba una postura oficial, sinón pol nivel de les mesmes: en cuestión de drechos fundamentales, nun hai nengún alderique qu’abrir.
Énte esti panorama, dende N’Ast queremos recorda-y a Podemos que’l drechu a emplegar la llingua propia ye un drechu reconocíu internacionalmente y que’l primer pasu pa esa reconocencia pasa necesariamente, nel casu del asturianu, pola so declaración como llingua oficial. Y daes les posibilidaes que-y apurren les encuestes a Podemos d’entrar na Xunta Xeneral con unos cuantos diputaos, quiciaes nun futuru prósimu esta declaración dependa de la so postura, polo que dende N’Ast queremos pidí-y a Podemos nun sólo que s’aclare col asuntu, sinón qu’apueste nidiamente polos drechos llingüísticos de los y les asturianes, pola OFICIALIDÁ DE LA LLINGUA ASTURIANA. Porque ensin oficialidá, nun va haber cambiu que valga…
Blog carlosxblanco.blogspot.com
Los acontecimientos atropiéllense unos pa con otros, písense los calcaños, emburrien y zarapiquen como diciendo “quítate tu que me pongo yo” Pero dellos diéramos avisos con abonda antelación cuando too esto taba in nuce. ¿Por? porque conocimos, lleímos y supimos de xente que los protagonizara cuando entovía nun yeren tan famosos. Davezu, les aneúdotes y esperiencies personales informen más y meyor qu´otres fontes más aséptiques. Empobinen la intuición haza la realidá.
Yá fui de los primeros nacionalistes en criticar públicamente la Sucursal o Franquicia de Podemos. Tenía de facelo énte tantu silenciu. Agora yá veo que hai blogues y una formación (Andecha Astur) qu´al traviés de representantes suyos lo denuncien. Yá me paecía raro tou esi quincemayismu tán aventáu, espardíu polos medios de comunicación, y yá fedía a xamuscu tou esi desendolcu d´ “indignados”. Formáu nel marxismu, sabía de sobra que la “indignación” nun yera otro qu´un estáu d´animu, y, poro, namái tien entidá si hai ventolines y boques soplaes pol mesmu Capital. Los estaos d´ánimu coleutivos nun surden de la nada. Hai vectores y hai fuerces que los emburrien. Capital non sólo madrilanu. Capital non sólo venezolanu. Capital desestabilizador.
Siguiera con della atención a esos quincemayistes y indignaos. Siguiéralos porque curiosamente d´ellos surdíen insultos a mamplén a los nacionalistes, inda a los nacionalistes que yéramos de la esquierda yá cuantayá y aneciábemos en qu´había estayes en común. Dalgunos de los atacantes al pensamiento identitariu, tamién, curiosamente, militaben en files de partíos que se reclamaben del nacionalismu, y tala militancia dába-yos credenciales pa engochar el llabor de los demás, sobre manera los que siempres fuimos independientes, ensin carné nin obediencia.
Decíen aquellos “indignaos” endolcaos na la asturina con estrella colorá, qu´habia que participar más nos “movimientos sociales”, nes “acampaes”, que´l nacionalismu (o, ¡ qué vieyu trucu! l´”asturianismu” d´esquierda) nun podía quedar al marxe “de la cai”.
Taba claro que la “participación” colateral colos quincemayistes, neto que nes movilizaciones sindicales, “anti-fascistes” y demás tenía una intención yá vieya: distrayer del oxetivu real del nacionalismu, restar enerxíes al envís cimeru: construyir una Asturies con másimu autogobiernu y algamar la Oficialidá y un afitamientu de la so Identidá.
Xunciendo nomes y empareyando anéudotes too cuadra. A min, a diferencia del Sr. Bermeyu,cuyo comunicáu soscribo nun me sorprendió la declaración vergoñosa de Daniel Ripa sobre l´asturiano. Daniel Ripa ye un españolista, y la mayor parte de Podemos y Somos y demás franquicies, como la mayor parte de la esquierda d´ Asturies (una esquierda bien poblada por empadronaos n´Asturies pero non asturianos de nacencia, dicho sía). Yo, como vieyu colaborador de Glayiu, dende l´aniciu, sabía de los redautores y demás colaboradores nesi mediu, que cuasi vi nacer. Conocía la composición de la estaya asturiana de “Diagonal”, tan venceyada a la otra web. Daniel Ripa y Diego Díaz yeren persones que lo llevaben. Trabayaben a comuña, robablen artículos a medies.Tou aquel que me lleía va unos años recordará los ataques d´esti últimu rapaz, empobinaos al nacionalismu asturianu, ñegándo-y, poco menos, que´l derechu a esistir y reduciéndolu a fascismu. Dafechu yo escribí tou un llibru pa defender al Nacionalismu Asturianu d´esos ataques de la esquierda españolista, munchos ataques provenientes de Díaz: Casería y Socialismo.
N´aquel llibru intenté demostrar qu´un analís marxista –y poro, revolucionariu- ye compatible col nacionalismu ensin dexar de ser nacionalista, anantes al contrariu, poniendo per delantre la necesidá de defender a un Pueblu que ye Nación va más de mil años y que ye colonia nel sen del materialismu históricu. La fata esquierda asturiana, en cambeu, taba –y ta- sapozada nuna mentalidá provincialista, cosmopaleta, acomplexada y esa fata esquierda nun sabe res de Pueblos, de naciones, de colonies, de llingües minorizaes por colonialistes. Nun sabe nada. Podemos sostituye´l Proletariáu Universal pol Rentista Universal.
Yo soi yá lo que se diz un “revisionista” (¿cómo non?) del marxismu, y (pa nada) considérome un dixebriegu. Toi d´alcuerdu con un enfoque federal pa España y pa Europa ensembre. Un enfoque que respete la etnicidá, la historicidá, la identidá, la pluralidá y que nos llibre de les actuales y absurdes fronteres provinciales. Una República de les Españes federada y fuerte nuna Europa-Nación. Amar la llingua asturiana ye amar la pluralidá pa España y pa Europa. Toa persona sensible y enemiga de la Globalización debería lluchar contra l´esaniciu de les llingües. Toos nós, inda los non nacionaliegos, debemos ponemos enfrente de Daniel Ripa, y de María Eugenia la de Gozón, y de xente d´esa triba y espeta-yos al alto la lleva na cara: “Soi´l to alversariu, toi contra ti, yes una torga a la mio lliberá y a los mios derechos”. Nacionalista o non, asturianos o non, de dereches o d´izquierdes, toos aquellos que persabemos que los Derechos nun se negocien, nun se cacareen, nun se somenten a ruxerruxes (o “chinchorreos” como diría la de Gozón, seique) debemos rebelanos contra estos “salvadores”. El mio derechu a espresame n´asturianu, en catalán o en suahili nun me lo quita nin dios, nin so Profeta, nin el sum-sum corda. Si Asturies toviera arguyu como sociedá organizada, de manera cívica pero contundente, debería ponese enfrente de toa esta pseudo-izquierda mazcaya, portadora eterna de Falcatrúes, inorante más qu´un moluscu, muerta y vieya d´idees, más rancia que Tutankamón. Da-yos el llombu, amosá-yos el despreciu, cuspilos na cara. Díci-yos a les sucursales que teledirixen dende la Complutense, Caracas, Riad o Berlín : Cola mio identidá y el mio drechu nun vais a xugar, fuera. Fuera porque nun soi un xuguete. Fuera porque engañastis, engañastis tolos qu´un día nos dixístis que l´enemigu taba dientro y qu´esi enemigu llamábase “purismu”. Pero Podemos nun ye qu´escuenda toa traza d´asturianismu. Ye que nun s´estrema de lo peor de lo peor que denunciaben UPyD.
Mensaxe a Compromisu por Asturies: por dinidá, disolución. Por dinidá, habéis de pidir perdón. Por dinidá, desapaecéi de la Política d´una vez. Nunca nun vos conocí. Si vos vi, yá nun m´alcuerdo. Nunca más quiero sentir falar de vós. Nunca más faléis en nome d´Asturies, de la identidá nacional, de la “salvación” del país. Yá tardáis en buscar dimisiones y pedir responsabilidaes. Somos pocos, pero los nacionalistes vamos tar en contra, en frente, en orde de batalla. Y, dende llueu, taremos a lo de nueso, non a los vuestros cuentos de vieya. La vieya esquierda fata que, nun lo escaeza naide, ye españolista tanto como galleguista (véi les visites y encamientos de Raimundo Viejo Viñas a Asturies yá dende los tiempos de la UNA, y agora en Podemos) ye enemiga, y yá lo demostró.