Identidá Astur

Queremos ufiertar esta entrevista a “Neville”, un ciudadanu asturianu que ta llibrando una aspra y valiente batalla contra los remanadores de la hestoria de la Nación Asturiana. Llucha que tien consecuencies graves, pos el poder madrilano y españolista tien un interés oxetivu en despintar la verdá del nuesu pasáu. Si un día sale a la lluz la verdá sobre Asturies, y acábense les manipulaciones, va venise embaxo l'inventu llamáu “España”, siquier dende'l puntu de vista historiográficu y cultural.

Encamentamos vivamente la visita de los sos blogues:

http://blogs.elcomerciodigital.com/neville/posts

http://elcombatedeneville.blogspot.com/

1- De primeres, díganos ¿quién ye “Neville”? ¿En qué consiste'l so “combate”? Porque nos sos blogues “El Combate de Neville”, tal paez que Vd. ta llibrando una guerra ¿contra quién?

Efeutivamente toi llibrando una guerra. Güei en dia la mayor parte de les guerres nun se llibren a tiros sinón nel escenariu financieru y de los medios d'espardimientu. La guerra propagandística yá dende los tiempos de Goebbels ta moviendo de forma paulatina a la guerra convencional.

Como nome "de guerra" escoyí Neville por sentime identificáu con tal personaxe na gran película The Omega Man onde un grupu de oscurantistes ya inquisidores llamáu "La Plaga" pretendia callar de toes toes la conocencia.

Nel estintu portal cultural Celtiberia prácticamente tol mundu intervenía con un llamátigu yo decidi escoyer esi.

2 -Paez qu'a Asturies ta robándose-y el so pasáu, manipoliando la Hestoria, furtiando la verdá sobre'l País. Eso ye lo que Vd. denuncia: ¿quién perpeten esos fechos? ¿Cómo qué fines?

Efeutivamente tou cuanto dixo na entruga espeya lo que ta asocediendo y entá quedó curtiu. Acomételo´l gafu ente académicu de la UAM en collaboración colos jamándulas locales nuna unión d'intereses espurios; los primeros por motivaciones ideolóxiques y polítiques, los segundos pa engordar los sos bolsos.

3- ¿Cómo podemos defendenos de tales agresiones y manipulaciones?

Nun doble frente; primero llibrando colos nuesos escasos recursos la guerra propagandística y segundu nel frente políticu votando a partíos patriotes asturianos.

4 -¿A qué atribuyi Vd. el fechu de que'l mundu asturianista sobremanera, y la parte más crítica de la sociedá asturiana, más polo xeneral, se desinteresen tantu por estos fechos? ¿Ignoramos el nuesu pasáu? ¿Escaecimos d'ónde venimos?

El mundu asturianista ta en manes -sacantes honroses esceiciones- de autotitulados intelectuales de salón y pequenos caudiellos políticos qu'anteponen el so interés personal al xeneral de la nuesa patria asturiana. La so cortedá de mires fíxo-yos afitase solu obsesivamente na cuestión llingüística dexando de llau la más fundamental cual ye la de los cimientos históricos que configuren Asturies y la so llucha constante contra cualquier dominación.

5- Un protagonismu nestos atentaos tener, según Vd., los paracaidistes de la UAM (Universidá Autónoma de Madrid)”. ¿Quién son estos individuos? ¿Por qué la UAM precisamente? ¿Qué papel desempeñen nesta colonización cultural que sufre'l País Asturianu? ¿Azorrona la Universidá d'Uviéu nesti respectu?

La UAM dende los tiempos del Proyectu Xixón d'Arqueoloxía participó viviegamente al pie de los jamándulas locales nel falseamientu sistemáticu de la hestoria d'Asturies y de les sos muertes arqueolóxiques; otros entes universitarios capitalinos en menor grau tamién participen de tales maquinaciones.

La so xefa suprema ye la Dra Carmen Fdez Ochoa y el de los jamándulas locales ye'l señor Álvarez Areces.

La Universidá d'Uviéu tarrez el estatus y el rangu de los visitadores de Cantoblanco; salvu Fdez. Conde, enxamás movió un deu na defensa de la memoria histórica d'Asturies que ta siendo bastardeada d'una forma ignorminiosa, un auténticu terrorismu cultural.

6- ¿Tuvo Vd. problemes por llibrar esti combate intelectual? ¿Atópase solo nél? ¿Ta'l pueblu ástur abondo organizáu pa faer frente a esti colonialismu y tracamundiu de la Hestoria?

Tuvi munchos problemes; una denuncia presentada en Burgos y llamaes amenazadores al mio trabayu. Salí triunfante de toes elles. Nun van callame y voi siguir tizándo-yos onde mas-yos manca poniendo al descubiertu una y otra vuelta la so actividá falsificatoria y les sos espurios intereses.

El pueblu asturianu nun ta organizáu; al igual que nos tiempos de la conquista romana ta encastráu en pequenos grupos de resistencia, anárquicos, ensin coordinación, que torguen una respuesta d´altor; llindámonos a llibrar una especie de guerrilla cafiante pa los nuesos adversarios pero que nun llega a esmolece-yos de forma seria. Namá reciéntemente pol aportar políticu y el terrible escándalu de la operación MAERA qu'afecta a Cultura éstos tán seriamente afectaos y contra les cuerdes.

7-¿Somos los asturianos herederos directos de los ástures de la dómina prerromana, romana y medieval?

Ensin dulda; ¿esisten los Vettones, los Vacceos, los Ilergetes, los Ausetanos, los Túrdulos güei en dia? Pero nós, mal que-yos pese, siguimos esistiendo y combatiendo na mesma dirección que fixeron toos nuesos antepasaos y que van faer los nuesos descendientes. La lleenda del pueblu asturianu y les sos xestes son un taragañu demasiáu grande pa los paracaidistes de la UAM.

8- ¿Defendi Vd., como faen los nacionalistes asturianos, que la nación o ethnos ástur ye una de les más antigües d'Europa? ¿Cree qu'hai un continuu ente la resistencia a los romanos, los godos y los islamitas? ¿Y ante Castiella , o sía, España?

Toles xentes de la franxa central cantabrica actuales provincies d'Asturies-Cantabria, norte de Llión, Palencia y Burgos manifestáronse de forma endémica contraries a cualesquier poder invasor como asina foi conseñáu tantu nes cróniques romanes como nes altomedievales; ye un fechu irrebatible.

La nomenclatura de tales pueblos ye lo de menos.

Per otra parte España nun esiste; ye un conceutu modernu, una imitación del modelu d'estáu centralista francés que s'intenta ensertar na Península tomando a Castiella como actor principal entá ensin el concursu real ya interés de la mesma Castiella; protagonizáu esti intentu por un bastardu poder mozarabita asitiáu en Madrid.

Les Españas ye l'auténticu estáu qu'asina se intitularon siempres los reis: Hispaniarum Rex y non Hispaniae Rex; una federación de fueros, corones y prerrogativas dientro de les cualos les Asturies -a diferencia d'agora- ocupaba una posición principalísima.

Mientres la Baxa Edá Media y coincidiendo con momentos de penuria o de descontentu la nobleza asturiana intentó delles vegaes la independencia de la Corona común basándose nel derechu que-y otorgaba ser parte constituyente de la mesma ya inclusive orixe d'ella.

Ye rotundamente falsu qu'Asturies tuviera sometida dalguna vegada a Castiella. Naide puede danos la independencia pola cenciella razón de que nunca la perdimos y nunca fuimos conquistaos.

Les revueltes de Gonzalo Peláez o d´Urraca "l'asturiana" -Coalla en realidá yera un bandíu- son revueltes nobiliaries por aciu les qu'Asturies reclama atención pa los sos problemes ya inclusive amenacia cola separación pero nun ye una guerra Castiella-Asturies.

9 –¿Defendi Vd. qu'esiste inda una cierta “mentalidá mozarabita”? ¿En qué consiste tala ideoloxía anguaño?

El poder mozarabita que ye mutante intentó dende siempres falsificar la hestoria de Les Españes a nivel xeneral y el d'Asturies a nivel particular y con más brenga. Yá hubo los sos más y los sos menos ente Elipando el metropolitanu de Toledo collaboracionista col Islam y l'Ilesia Asturiana representada pol Beatu de Llébana; foi un terrible bracéu ideolóxicu del qu'Asturies resultó trunfante. Darréu los mozarabites y musulmanes conversos nutrieron les files de la Inquisición de forma masiva apoderándose de la Monarquía por aciu tenebroses tuteles y cometiendo l'alta traición d'apurrir la Corona Común a una dinastía estranxero y enemigo, los Borbones, al pie de los cualos protagonizaríen la creación del nicio llamáu España col cual pretendíen según ellos restaurar l'estáu central de los Godos, el poder Toledanu del cual seria Madrid herederu redivivu.

Ensin dulda los entes académicos madrilanos y quien-yos sofiten son herederos direutos de los mozarabites siendo Roma, el Reinu Visigodu Toledanu y los Reis Católicos la so Santísima Trinidá, los trés pegoyos sobre los qu'habríen de llevantar el gran edificiu de la so mentira y la so falacia llamáu España.

La so obsesión con Asturies y la so encarnizamiento cola so hestoria ye esplicable una y bones Asturies ye depositaria de la llexitimidá histórica d'una Corona Común secuestrada y bastardeada; les cróniques sobre la creación del reinu asturianu son una horrible realidá que nun pueden soportar de nenguna manera.

10 - La figura de Pelayo foi usurpada pol españolismu, llamáu en Asturies “covadonguismo”. ¿Cree que don Pelayo yera más bien un líder indíxena ástur? ¿Cómo definiría Vd. el covadonguismu?

La figura del nuesu primer caudiellu Don Pelayo, Pelagius, Belay el Rumí, Balaya, foi usurpada pol poder mozarabita; pol poder conversu instaláu na antigua ciudá beréber d'A'l Majrit agora Madrid.

L'orixe de tal caudiellu ye baladí pero lo que ta claro ye que toles cróniques de la dómina coinciden en señalar que foi escoyíu caudiellu polos ástures tres una asamblea.

Nun se conoz nengún casu na dómina de la Invasión Musulmana d'un godu escoyíu caudiellu por un grupu étnicu hispánicu o por un grupu del reinu Toledanu adscritu a una denominación étnica o territorial que se pon so les ordes d'un godu; namá se fala de lluches ente godos y musulmanes o ente cristianos y musulmanes.

Independientemente del orixe de Don Pelayo la revuelta antimusulmana foi protagonizada polos ástures según la creación de la Xefatura Militar que cristalizó nun reinu distintu y distante del de los godos.

Sacantes que el poder mozarabita acepte que'l famosu descubrimientu d'América foi Xenovés y non español porque Cristobal Colón yera.......

Lo que ta claro ye que Pelayo gociaba del enfotu de los ástures y yera daquién venceyáu a la tierra asturiana; posiblemente nun yera godu: la espedición de Wamba nel 680 contra los ástures namá 30 años antes de la invasión islámica y la mención nel testamentu d'Alfonso II de que tenía tierres en Tiñana -parte central d'Asturies- posiblemente tierres patrimoniales confirmaría que yera un potentáu local. Por si fora poco los musulmanes califíquenlu como "pollín selvaxe" aludiendo quiciabes a un calter tribal y llámenlu Belay el rumí non Belay el qut; eso ye bien significativu una y bones los musulmanes solo estremaben ente romanos y godos.

Tocantes a Cuadonga posiblemente namá foi un choque armáu ente dellos que se produciríen na zona; quiciabes el de mayor relevancia.

El Covadonguismu ye un símbolu que nun tenemos de dexar cayer en manos del poder mozarabita. Cuadonga tien de ser el principal iconu de la resistencia asturiana contra tou intentu de dominación.

Pensar qu'aquel puñáu d'ástures a les ordes de Don Pelayo naquellos momentos y naquella situación pensaben en daqué más qu'en sobrevivir y salvar el pelleyu ye puru deliriu.

Hasta los tiempos d'Alfonso III y sol influxu de los numberosos refuxaos del sur nun puede falase d'una auténtica Reconquista.

11 –¿Qué personaxes de la cultura, la ciencia y la política asturianes son los más culpables de toa esta manipulación y robu de la nuesa hestoria?

Toos aquellos que s'allinien coles posiciones de los paracaidistes de la UAM y los jamándulas locales tantu de forma activa como pasiva.

Gracies, Neville: a siguir cola to valiente llucha