Ta tristi, muy tristi l´aldea asturiana;

Ta tristi, muy tristi l´aldea asturiana;

Quedóse´n sin vida, quedóse´n sin alma.

Ye la voz de mio paisanu, el xixonés Pachín de Melás, la que canta con pena a l´aldea asturiana. Bien de veces lleí a los críticos lliterarios qu´esti cantu señardosu a l´Arcadia perdía foi una torga, un cáncanu, a la dignificación y espoxigue de les lletres asturianes, que d´esta miente empobinaríen pela sienda de la desconexón cola realidá: y la realidá tenía de ser, poro, la del industrialismu, la custión social (v.gr. obrera), la llucha de clases, la socioloxía urbana que yá mozcaba, nos tiempos mesmos de Pachín, la vida asturiana, una vida qu´entainaba al llombu de l´aldea.

Esto ye verdá y non. Pienso que si los asturianos cantamos más que naide a l´Arcadia perdida ye porque realmente la perdiéramos. Yo mesmu, nacíu y criáu en ciudá (la mesma ciudá de Pachín), tamién perdiera –de dalguna manera- una aldea: tamién sé lo que ye l´orbayu a la puerte casa, igualmente sé lo que ye segar a gadaña (masque nunca se me dio bien, y menos la xera de cabruñar), etc. La mayor parte de los asturianos “vieyos” (ye dicir, con raigones familiares inmemoriables) sabemos de xuro lo que ye l´Arcadia, ensin los tipismos nin los tópicos de guía de turismu. Asturies foi aldea, ye aldea y siempres tendrá que ser aldea. Otres sedrán les provincies ensin raigaños. Les mesetes onde los pueblinos encalaos dan el llombu a la Ma Natura, porque ellí ye perra la Ma, o meyor, la Madrastra naturaleza. Asturies ye una bayura estética en si mesma: braña, prau, viesca, aldea y … casería onde trabayu y diversión danse la man y casen en santu matrimoniu.

Amás (y aprofito pa dicilo) yá nun ye creíble´l sambenitu castellanista de que´l “bable ye un dialeutu rural que namái sabe falar de les coses de l´aldea”. Un sambenitu que los propios asturfalantes (más bien amestaofalantes, por dicir) llegamos a facer nuestru. Con munchu xacíu lleí a Sánchez Vicente la tesis de que l´Asturies más real y más crítica, la que más tuvo al altor de so tiempu fue l´Asturies de los escritores n´asturianu, polo menos de magar 1975.

L´Asturies del barriu obreru y de gran ciudá asfaltada ye tan asturiana como l´aldeína más de postal y souvenir, y dacuando, yelo más. Pero hai n´Asturies aldeana daqué inesplicable y esencial qu´a toos nos fai taramellar.

La perda d´esa Arcadia entamó haza 1850, más o menos, cola revolución industrial. Yá yera grande la perda nos tiempos de Pachín de Melás, tiempos nos que, polo que sé de mio familia que vivió esa dómina, nun taba tan estigmatizáu l´idioma asturianu como lo tuvo darréu, con Franco y cola Transición. La perda de l´Arcadia yá paez tener el relieve y la tiez d´una perda eterna. Tamos siempre perdiéndola: con cada autovía, cada eólicu, cada muséu (asina llamen agora a los Tanatorios Étnicos). Igual que los teólogos dicíen que la Creación o la Cayida del Home nun yeren fechos puntuales na Historia sinón fechos eternos, qu´asoceden siempres, tamién la Destrucciónd´Asturies ta convertiéndose nun fechu esencial, eternu, un dexar de ser pa recordar que fuimos…

Y ye que nos versos d´ALMA ASTURIANA alcuentro una formosa crítica a la Idea babaya de Progresu, esi Progresu que tantu invoquen nuesos políticos. Cuando Pachín, el Progresu yera la cobicia d´oru prietu, el carbón, la cobicia de capitalistes foriatos qu´asesinaben montañes, qu´arruinaben el paisaxe, que ye como dicir, nel nuesu País, l´Alma Nacional. Agora, envede mines, búsquense sustitutos siempre nel magüetu sen desarrollista: Muselones, Enerxía Llétrico, Eólicos, Autovíes y altes velocidaes. Los torpes progresistes de güei nun saben que quieren “avanzar” haza´l sieglu XIX otra vuelta. Progresamos haza´l pasáu.

¡Morrió la leyenda, morrió ya “l´Arcadia”;

Matóla´l progresu qu´a Asturias arrasa!

Fendieron los montes, fendieron la braña;

Fumeru qu´afuega, cuerre per la campa;

El ruidu aturulla, ruxidu que plasma

Alborota´l valle que tranquilu taba.

El home avariosu la vega ´smigaya

Rincando del fondu tesoros que guarda

Nel senu escondíos la tierra ´sturiana;

Pensando dai vida, arrínquen-i´l alma!

Quixera que pensaran toos nesti poema, y si nun ye como pa dicir güei, un sieglu depués, los mesmo; si nun ye verdá que  los progresistes d´anguaño “Pensando dai vida, arrínquen-i´l alma!”.

El PSOE ya IU, a comuña, lleven bien d´años arrincando-y l´alma a Asturies. El so futurismu, el so conceutu desarrollista d´una Economía asturiana nun tien un res de nacional. Una Economía nacional ye una Economía que nun escaez el campu, que talanta dende l´aldea pa facese universal. Yá nun hai país…

Aquellos fidalgos de la dómina de Xovellanos lleíen a Adam Smith, Bacon, Aristóteles, Montesquieu y Kant ente cucos d´herba, panoyes colgaes de la panera y piles de cucho pela parte de tres de casa. La so casona blasonada yera talmente como la vecín “aldeanu”, meyor y más grande, pero tipolóxica y esencialmente yera la mesma casa asturiana de piedra y madera, y d´alma nórdica y, poro, universal. Dende un conceyu terremotu, nun país verde y atlánticu, fechu con moderación y orbayu, ellos talantaben el mundu. Esi país verde yera blandiu, habitable, Arcadia que llevamos dientro, igual que la firía sangrina que los capitales foriatos y los Reis Hispanos (o sos equivalentes republicanos, pero igualmente hispanos) nos causaron nel corazón. “Esmigayada Asturies”: el poeta nun pudo escoyer pallabra meyor.