Asturies: "la Comarca"

Ún de los grandes valores d´El Señor de los Aniellos y, en xeneral, de tol corpus tolkienianu, ye´l de defender y honrar el valor del pluralismu cultural y étnicu. La obra del caderalgu oxoniense, filólogu nel sen más noble, amante de les pallabres, ye la obra d´un pluralista cultural. Les cultures y los pueblos nun tienen por qué amestase nin arrenunciar a les sos Tradiciones, Valores, Llingües, Vezos y réximes de gobiernu. Les cuatro races llibres de la Tierra Media (Homes, Elfos, Nianos, Hobbits) respétense unes a otres, reconocen l´alteridá y, al tiempu, la fraternidá qu´ha haber ente unos y otros pueblos. Y tocántenes a los Homes, una y bones tean civilizaos y separtaos per fronteres polítiques (Rohan, Gondor), el respetu y la solidaridá ente pueblos apaez como máxima norma política y moral. El Retornu del Rei (Aragorn) al tronu valeru bien de sieglos, nun ye solamente´l retornu a Gondor: ye´l retornu del Imperium, de la llei y l´orde a cargu non yá d´un monarca absolutu, sinón d´un monarca qu´espande la so man salvífica a tolos demás paises, al norte y al sur d´esa Tierra Media que nun ye más qu´un fragmentu de la Naturaleza, de la Creación.

Un Rei de Reyes, un Rei d´homes, d´homes llibres que reconocen el valor de la xerarquía y qu´idealmente conceden a los más xustos el so ameritáu altu llinax. Una Monarquía ideal la d´Aragorn, un Imperium sobre pluralidá de países (lo que recuerda la catolicidá de la idea d´Imperium, el so calter universal). Dalgo que fracasó na Modernidá europea cola invención de los estaos-nación y el xovinismu de les cases reales n´ánimu d´inventar l´equilibriu de “potencies” rexonales. Los Principaos, nel sen medieval de la pallabra, esto ye, les repúbliques autogobernaes y con “franquicies y llibertaes” podíen tener Rei, o onon, tar emarcaos dientro Corones nacionales o Imperiales, pero yeren –al marxe d´esto- suxetos soberanos qu´ameritaben la mayor de les estimances y considerances al Soberanu. Asturies recuérdame bien de veces la Comarca de los hobbits. Tolkien pensó n´Inglaterra pa idear la Comerca, esa Inglaterra entovía “verde y ensin tantu ruiu” que la Revolución Industrial achuquinó. Y yo pienso n´Asturies verde y ensin mines nin Ensideses, ensin invasiones culturales que truxeron un Mal difícil de saniar (Castiellanización, africanización, urbanismu, mines, ideoloxíes, suciedá...). Asturies tamién ye “la Comarca” tolkieniana.

Tolkien quixo escribir una “Mitoloxía pal so País” (Inglaterra). Dalgo ansí rique Asturies: mitocrear una Mitoloxía propia arrincando de la Memoria coleutiva aquello que bramente somos, a partir d´aquelles xentes llibres, atlántiques, celtxermániques, templaes, qu´una vez fuimos.