Creación del alma coleutiva

Creación del alma coleutiva

Al rodiu los mitos asturianos, barrunto qu´hai equí un descomonáu “capital” pa ser tomao en serio. Nun se piense namái nun llabor de recopilación, estudiu de fontes orales, divulgación y comparanza, etc., estudiu pernecesariu, urxente, una y bones sabemos que la Universidá d´Uviéu ye un desastre nesti sen. A parte d´esi llabor, el Mitu en tou país, en toa nación, ye un barganaz y un depósitu de les estructures antropolóxiques básiques de la mesma, báqsicu pa crar y non sólo pa recordar (velequí a Tolkien). Un manancial imposible d´escosar, pero al qu´hai qu´acceder.

Dicen pelos foros “que de la Cultura nun se vive”, y que lo qu´importa ye lluchar escontra´l paru y la esplotación y coses d´eses. Hai que lluchar, sí, pero sabiendo que la Cultura ye Vida, ye la Vida mesma nel planu coleutivu y históricu. Nun solamente vivimos colos “contemporánios”, sinón tamién colos “coterránios”. Miles de xeneraciones precedieron al mio existir y ficiéronme ser como soi, y xustifiquen que sía lo que soi. Convivimos colos muertos y antepasaos, y ellos constituín una nación tamién. Igual qu´hai una identidá personal, y sería el fin de la humanidá mesma´l fechu de qu´un poder supremu fabricara clones numbéricamente idénticos a una persona, hai neto una identidá coleutiva –davezu milenaria- que nun depende res d´un supuestu “derechu a decidir”. Y, per baxo de les contixencies polítiques del “sieglu”, esta identidá posa fonderamente nun mar de mitos, escuru y escaecíu, pero que llevamos dientro.

El meyor llibru asturianu sobre mitos asturianos que conozo ye´l de Cristobo de Milio Carrín, La Creación del Mundu. Munches hipótesis y dellos aspeutos metodolóxicos igual podrán ser criticables pal sabiu positivista, pero con too, pámeque parte d´una idea madre y fundamental: tamos viviendo na epidermis d´un gran secretu, un secretu a voces. El secretu de que somos una de les más vieyes naciones d´Europa y que compartimos más que munches otres nesta latitú del planeta el fondu celtoxermánicu. Tamos como sonámbulos caminando pelos valles y montes del País escaeciendo les voces que vienen del fondu la Tierra. Volviendo a Tolkien, al que considero´l meyor Mitopoeta del sieglu XX, hemos recordar que´l nuesu mundu sería más feliz ya íntegru si aceptáramos que somos una hermandá de “races” de cooperen y se respeten ente sí (elfos, homes, nianos y medianos, aegún l´escritor inglés), pero qu´asumen vezos culturales y llingüísticos irrenunciables y privativos, y que sólo los esbirros del Poder despóticu (Mordor) tenten d´uniformizar. Pues bien, nun caigamos na tentación de les uniformizaciones, pues ye sabío que detrás d´un rótulu aparentemente progresista –“español”, “ciudadán del mundu”, “proletariu”- escuéndese en realidá daqué más prosaico: “consumidor”, “carne de cañón”. Mitoloxíes milenaries, como les qu´estudió Cristobo, nun tán al mesmo altor que mitoloxíes barates d´ayeri y de güei (por exemplu, les qu´apurre la ideoloxía: Pasionaria, José Antonio, Franco, El Che, Ho-Chi Min...). Enantes de Pelayo, nun quedaron testimonios con nome propiu de los vieyos dioses o héroes, pero como arquetipos ensin nome siguen tando ehí, dientro l´alma y son fonte y causa de que nun perdamos del too dél sen de la dignidá y y dél autorreconocimientu como pueblu diferenciáu.