Grandes y pequenos

¿Quién ye pequenu y quién ye grande? ¿Qué diferencia hai ente un pueblu o nación pequeña –anque con munchu valir y bravén- y un imperiu toupoderosu? Los homildes, talo como les apariencies, engañen. Esa ye la lleición que sacamos d´El Señor de los Aniellos. Los últimos sedrán los primeros.

Por exemplu: achaplara l´arguyu moru, esprecetando de “trenta asnos selvaxes” allá pel sieglu VIII. Los trenta burros selvaxes ¿qué mal-yos podíen facer, unos pocos cántabros y astures ellí arribones ente les peñes d´un país xabaz y norteñu? Pero lo pequeno y apigazao medra si hai pebida de grandor dientro. El Güeyu de Mordor nun amirara abondo pa esti gran pequenu País de xente mediano, La Comarca (The Shire), ye dicir, Asturies. Y esi fue´l principiu del so fin, el Güeyu hubo zarrar.

Descomonaoas exércitos d´orcos, y tamién d´homes tornaos pa contra´l Mal, milenta trolls y criatures malines, mases d´esclavos, mercenarios y soldadesca de corazón podre... Toos ellos nun fueron quién a vencer a una precaria ya improvisada allianza anovada ente les Races Llibres. Llámame muncho l´atención el rexistru llingüísticu urbanu de la tropa d´orcos, bien usáu por Tolkien, el rexistru orcu de los que falen como reclutes de suburbiu industrial, la fala de xente lumpen mui del sieglu XX. Xente porcaz y miserable, artificiales ellos mesmos, productu d´antigües degradaciones d´elfos ¿Qué puen facer millones d´orcos énte un garrapiellu de corazones nobles. Pues corazones nobles son los que porten dalgo más qu´una misión, ye dicir, la destrucción del Aniellu, del Únicu: los valores de Sam y Frodo son la lleltá (ablucante y bendita llealtá la de Sam Gamyi), el bravén (ínsitu en cuasi cada hobbit, pesie al xeitu “burgués” y hedonista que predomina nesti pueblu, tan inglés, y tan asturianu, en bien de rasgos).

Dos minúsculos “medianos” que paecen poca cosa énte los imperialistes del ferruñu y el velenu, esos que suañen con nueves Romes, nuevos Escoriales, con seladá d´Imperios de Carpetoventonia “onde nun se tapeza´l sol”...paecen tan poca cosa estos qu´aporten dende una Comarca que malapenes sabe nada de grandes xestes heroiques. Dos almes que surden ente una raza de granxeros de país verde y templáu, hobbits epicúreos por demás y que, por embargu, cuandu nun ye tiempu de folganza, saben ser duros, coraxudos, resistentes, saben reconocer dientro de sigo´l valor infinitu de la llealtá, el corax y una brenga terrible qu´esbarrumba a Sansones y demás xigantes,

Asina, Sam y Frodo somos toos nós, quiciás, los nuevos astures que tovía hemos cumplir con una sagrada misión de “saneamientu” tantu de la Civilización como de la nuestra propia y bienamada “Comarca”.