Xacíu

x Carlos X. Blanco

Gran  parte de la xera que queda por facer ye de castra intelectual. Pescudar los raigaños d´una nación, les fontes qu´afiten una identidá, les diferencies y asemeyances coles vecines. Inda más: hai mester tener perclaro qué ye una nación. Dellos amigos coméntenme dacuando que nun se pue ser “nacionalista” a seques, ensin más. Que lo hai que ser, si se quier, pero “de dereches” o “d´izquierdes” o del centru, o de casa mio güela. Háilos que nun conciben esta autodefinición ensin apellidos y prosapia, onde caben combinaciones, permutaciones y xuegos de mesa: “anarquista, ecoloxista, lliberal, del Sporting”... Yo esto nun soi a tomalo en serio. La cosa ye bien seria como p´andar colos pasatiempos y les llargues autodefiniciones. Tengo que responder que sí se pue ser “nacionalista” a seques, masque hai un problema na propia pallabra, que posee una terminación que la rellaciona con otros “-ismos” (lliberalismu, socialismu, catolicismo) y, poro, remite a una militancia, a una afiliación, a una dixebra social onde teenmos a otros en frente, y a los qu´hai que combater o, dialécticamente, vencer. Esi “-ismu” nun me presta.

Reconozo´l problema terminolóxicu, ya inda más cuando reconocemos que nun hai “nacionalismu” n´Europa anantes del romanticismu, anantes de les guerres napoleóniques, anantes del sieglu XIX y del rellumante llabor de los filósofos alemanes, lluminaries que, depués de Grecia, descubrieron otres dimensiones de la Civilización Europea, sacantes la Razón y la ciencia natural: la dialéctica, la voluntá, la patria. Herder o Hegel, y non solo Rousseau y los “Derechos Universales” debíen formar parte del bagax del home européu civilizáu. Y recordar, con Lord Byron (si mal nun recuerdo) que l´home ensin Patria ye´l más probe del mundu.

El nacionalismu, talo como yo lo veo, consiste en gran midida nuna cuestión de llealtá. ¿Por qué facer lo que ficieron los mayores, lleales a la Tradición, eso sí, siempres con una selección y adaptación previes?

Nacionalistes ¿por qué?

Por llealtá. Nel corpus de la mentalidá asturiana hai una parola clave que definió la identidá de nueso demientres sieglos: llealtá. Tengo que decir a les clares, depués d´años intentando predicar civismu, moderación y tolerancia nos ámbitos del nacionalismu astur (o asturianismu políticu) que los mensaxes empobinaos al Pueblu asturianu a proceder con desllealtá, mensaxes asonsañaos d´otres realidaes ayenes dafechu, van dar siempres cola ñarra en suelu. Cuando yo escribí “Rebelión Leal en las Periferias” (un articulín mui lleíu fuera d´Asturies) hubo quien tuvo en boca aquello decime: “esto ye españolismu” o “esto ye casquismu”. Selo, porque recibo munchos mensaxes y comentarios, non siempres públicos. Y a min, la verdá, nun ye que m´entusiasme esto de la “Una. Grande y Llibre”. España ye, pa min, una realidá desagradable, poco estimulante, una realidá política fallida como Nación, y constitúi un exemplu de llibru al rodiu de cómo se ficieron mal les coses dende l´entamu, dende los Borbones principalmente. Como ciudadanos cola nacionalidá española, somos el váter d´Europa, hemos ser conscientes y podemos ver tolos díes cómo amenorga la importancia y la credibilidá d´esti Estáu (dende´l Rei hasta´l chusqueru menor del Reinu), más africanu y tercermundista qu´otros.

Pero ¿qué llínia plantegar p´Asturies? De xuro qu´una de les Comunidaes autónomes más dependientes del estáu, y más desorganizada políticamente, con un clientelismu asemeyáu al que se palpa nel Sur (Andalucía, Extremadura, Castiella-La Mancha) nun podemos reivindicar soberaníes y autodeterminos inmediatos. Equí nun trescaló´l nacionalismu políticu y más entá, equí viviérase siempres un sentimientu más a lo “british” qu´estremó siempres la Patria del Reinu, sabiendo desllindar llealtaes. Nada d´eso saben los “asturchales” y demás indocumentaos, que nun sabiendo res del so País, senciellamente odien a España y puntu. Yo quiero dicivos, y nun me tengo panada por un cura irenista, quiero dicivos a toos que con odiu nada nun se fae que pague la pena. Que lo que tengamos que facer ye por amor a la Patria Asturiana y eso rique pacencia, procuru, ciñu, trabayu continuáu y sele. Rique menos testosterona y más materia gris, conocimientu de la Historia y de l´Antropoloxía del País.

La xente davezu tracamúndialo too (soberanismu, independentismu, nacionalismu, rexonalismu, ismu, ismu, ismu) y la cultura política de la mio redolada ta, de forma esmolecedora, nunos niveles de primitivismu terribles. Pero ha dicise bien alto: Defender el nacionalismu asturianu ye defender la llealtá pa col País, y pola cueta la tema d´España (¿qué ye o qué ta dexando de ser? ¿con ella o ensin ella?) ye puramente accidental.

Asturies cayó baxo´l poder de los xíbaros. Tán reduciendo-y la cabeza, y amenorguen dafechu les cabeces nella. La parte del Pueblu que tovía bebi de la Tradición y que se siente astur, por embargu, nun cai nes trampes y nun pica: ye como un pexe avisáu y desconfía de los anzuelos, de les soflames qu´apelliden a la desllealtá, a dexar de ser lo que realmente hemos ser. Desfilen nesti Antroxu partitocráticu milenta payasos vistíos de toreros unos, de gudaris otros, de Belarmos Tomases o de Bonísimos Padres Redentoristes, pero nunca desfilen (o cuasi nunca) asturianos. ¿Ónde tarán los asturianos mios?

¿Ónde? Cenciello: Trabayando.  T R A B A Y A N D O: que ye lo que nun se sabe y nun se quier faer n´España. La nuesa Tradición ye trabayar y producir, y atropar cebera. La nuestra sencia ta en ser un Horru pergrande, una Casería autosuficiente. Entiéndanlo bien, ciberactivistes y lladrones de votu, equí hai asturianos trabayando, con o ensin el restu del Mundu. Los Borbones, como les dereches o les izquierdes, los Reinos, como les Revoluciones y les Terceres Repúbliques, les corones y los euros, too ye pasaxero. Pero la Nación queda, porque la Nación ye Milenaria.