Gracies Ferreirela de Baxo, Gracies José Luis.

x Carlos X.

La meyor lleición d´etnografía que nunca recibiera fue la que mos dio esti mes de xunetu don José Luis na Casa Natal del Marqués de Sargadelos, en Ferreirela de Baxo, Santalla d´Ozcos. Fue tou un luxu, tou un barganaz de sabiduría´l qu´aportara hasta nós, falando d´esa Asturies que yá inoren la mayoría de los asturianos, describiendo esos Ozcos tan desconocíos pa cuasi tol mundu. Tol mundu menos los habitantes del territoriu qu´inda lluchen por caltener raigones nél, por enseñalu llimpiu y real, cola tresparencia d´un mundu y un mou de vida que foron como foron y qu´entá esiste, un mundu que ta ehí, llistu pa ser conocíu y pescudáu.

Gracies, José Luis por enseñanos esa casa onde tu y tolos tos antepasados nacieran y morrieran. Gracies por enseñanos esi escañu onde los de la to castra nacieran, parieran y morrieran. Por amosar esa cocina enorme, abonda p´agospiar a toa una familia en delles xeneraciones y a un carrapotáu de méndigos y artesanos itinerantes. Gracies por amosar esi caborniu hincháu, qu´agora investigues nos llaboratorios d´allalantrones, onde se guardaba´l semenciu la casería baxo llave, talo como un arcón d´ayalgues, que ye lo que satamente ye, l´ayalga del alimentu que fai posible la vida. Supimos, yo y la mio familia, d´esi personax tan curiosu y enllenu enseñances, Ibañez, que nació nesa, la to casa, la qu´agora enseñes al foriatu, al curiosu, al de ciudá, al de secanu... Esa casa socesivamente ampliada per aciu xeneraciones y ameyoramientos, esa casa qu´agora paez casona pa una “familia nuclear” pero que yera antañu abellugu escasu de montonera de persones, xente de la familia y de fuera, baxo un techu que los xuntaba a toos por una inexorable llei, la de la sobrevivencia, la producción, y l´intercambeu de servicios.

Benditos sian los Ozcos y les innumberables riqueces qu´escuenden. Llástima que yo nun sepa escribir nin falar entá la to formosa llingua, Ozcos del alma, pero dexástime namoráu pa siempres. Fui ellí pretendiendo tener vacaciones y salí d´ellí cuntando con una tierra nueva dientro del mio corazón, qu´ensin dulda enanchó yá viendo esa comarca ablucante pola amabilidá de les sos xentes, la guapura de les viesques, la cultura milenaria ellí atropada. Gracies, tamién a María José poles tos “oreyes” que nos regalasti pa llamber nel camín y polos regalinos pa les neñes que nos dexaras por sospresa. Que queden los “kebaps” y los “ozús” en Xixón y notres tumbes d´asfaltu, que´l mio corazón tamién ta –y ta más- nos Ozcos y nos demás territorios que nun perdieron el ser. Países que son lo que son, un espeyu de la vieya nación campesina, nórdica y sufrida qu´una vez formábemos. Los de la rexa na ventana y paré “enjabelgada” tienen que pensar que ye too un suañu al sentir qu´una vez hubo obligación de agospiar a méndigos y artesanos de fuera dientro, dellos díes, nuna mesma casa. Los códigos d´aquella casería virtualmente autosuficiente, malamente son talantaos anguaño, depués de tolo que llovió, pues nun solo llovió agua.

Gracies, José Luis. Nun sé si dalguna vez vas lleer esti pequenu homenax a ti y a la to tierra, que tamién ye mía. Qu´otros colen a Benidorm o a sintir a guíes robotizaos, a “axentes de turismu”. Lo de to fue una lleición maxistral y yo tenía por fuerza qu´agradecételo.