Somos los hobbits

Na so novela “Nos cantiles de mármole” Ernst Jünger describe un país fermosu y civilizáu –Les Mariñes- amenazáu pola xentecaya qu´aporta de les viesques vecines. El Guardabosque Mayor, un trasuntu de Stalin o Hitler, cabezaleru de lo peor de cada casa, xente sucio, violento, porcaz, entama la conquista de Les Mariñes, y nun paez tanto por un enclín haza´l poder –non solo- sinón pol gocie que-y da al dictador oclocráticu l´achaplar y mansuñar pa siempres tolo bello, noble y honrao que l´home supo llevantar. Los dos hermanos protagonistes de la hestoria recuerden en demasía a los dos hermanos Jünger, veteranos de la guerra, patriotes alemanes, “tradicionalistes” si se quier, pero en manera dala “nazis”. Los nazis apaecen poco amazcaritaos na novela que vos encamiento, y son la fonte mesma de la degradación de la civilización. Tropes de xente grosero y armao, odiosos y rabalbosos, con poder d´influxu inda ente los “intelectualinos” que siempres nagüen por emociones membrudes que-yos saquen del aburrimientu. La bárbara xente d´un país vecín a les Viesques y a Les Mariñes, La Campaña, ye –pola cueta- noble ya íntegra, poco dada a la sotileza. Y con too y con eso son preferíos polos dos hermanos – veteranos de guerra y botánicos d´una especie mística, inda son los sos aliaos. Val más tener al llau el corazón bárbaru y arrogante de les xentes cencielles de les caseríes de La Campaña que la puxarra fedoriente que s´escuende nes viesques controlaes por un Führer que fai d´embudu y catalizador oclocrático (poder de la xentecaya).

Les Mariñes d´esta novela de Jünger recuerden muncho la Comarca de hobbits xeniudamente descrita por J.R.R. Tolkien na Triloxía d´”El Señor de los Aniellos”. Un idílicu paraísu de tradición y bon vivir arrodiáu de peligros, sumíu nun incendiu universal onde la maldá más infinita ta a un pelu de llevalu a la ruina. Nun será culpa de mio  la de nun tener avisaos a los paisanos míos (¿aú tán los paisanos míos?) sobre l´incendiu que ta a piques de llegar. Una Europa muerta, un Islam encesu y enrabietúa, espansivu, un totalitarismu cégaru y bárbaru a la vuelta la esquina. Asturies, que pa colmo ta integrada nun Reinu sureñu, semi-europeú, circunscritu a la barbarie africana, ye esa Comarca de gayoleros hobbits, o de refinaos habitantes de Les Mariñes que –anguaño- nun paecen tar enteraos de nada.