Europa como nación

Europa ye una nación. Como ensame de pueblos y cultures, Europa ufre l´aspeutu d´un mosaicu bayurosu de pueblos o identidaes estremaes dende miles d´años p´acó. Nostante, l´aniciu d´Europa como ensame ye bien unitariu, una y bones los pueblos indoeuropeos esparnaron un asemeyáu panteón, una trifuncionalidá social (soberana, guerrera, productora), unes estructures llingüístiques idéntiques, etc. dende fines del neolíticu. La mayoría de los pueblos y identidaes culturales europees que remanacen anguaño pertenecen a una de les grandes cañes del primitivu pueblu indoeuropéu. Les cañes son: celtoxermániques, llatines, heléniques y eslaves.A partir del Imperiu Romanu y, dientro d´elli, a partir de la cristianización de los pueblos d´Europa, impúnxose della idea d´Universalidá ("Humanidá") que nunca nun foi a tapecer dafechu la idea d´Europa como ensame unitariu de cultures o pueblos, con o ensin estáu propiu. L´espeyu deformante d´una "Cristiandá" homoxénea, universalizante y niveladora nunca fue a tapecer del too esa síntesi ente pluralidá (l´ensame de pueblos europeos) y unidá (conciencia más o menos difusa de formar un sistema unitariu y con equilibrios propios).

El destín d´algamar una Europa-Nación, una unión dafechu, vese torgáu por delles ideoloxíes que tienden a matar les identidaes (tienden a asesinar la conciencia nacional y rexonalista). Son ideoloxíes etnocides como (1) l´universalismu d´aniciu xudeocristianu, nivelador, que nun reconoz drechos coleutivos nin "patries" (Cristianismu, lliberalismu, socialismu), (2) l´"occidentalismu", esto ye, l´intentu –en gran midida llográu- por anubrir la identidá d´Europa y de los sos pueblos baxo la mázcara d´una "civilización occidental" que, en realidá, supón la hexemonía –anguaño decadente- d´un Imperiu norteamericanu domnador no militar y no mercantil, Imperiu que coloniza y aculturaliza tol espaciu europeu per aciu d´un "american way of life" impuestu y aceptáu masivamente; (3) laglobalización, como fola qu´esanicia identidaes, fola que sólo quier reconocer individuos y mases d´individuos "átómicos", pero nunca pueblos, rexones, cuerpos sociales intermedios, nunca naciones, nunca drechos comunitarios nin tradiciones locales y coleutives, y esto, en beneficiu d´un garrapiellu d´empreses multinacionales y d´una República universalizadora y globalizadora ab origine: los E.E.U.U.; ensin agotar l´inventariu de les torgues, finalmente solliniamos la torga (4), la torga chauvinista del "Estáu-Nación". L´Estáu-Nación n´Europa, bien de veces, ye resultancia d´azares dinásticos y trataos militares continxentes, y anubre, sobre manera nos Estaos de tamañu mediu y grande, una pluralidá d´etnies, llingües, rexones diferenciaes y nacionalidaes; xusto cuando l´Estáu-Nación ta entregando la so Soberanía a inventos burocráticos ensin alma nin futuru (lléase la "Unión Europea"), ésti nianu políticu y decadente ta aneciando en convertise nun guardián represor de les rexones y nacionalidaes que -étnica y históricamente- lu conformen. La solución pasaría por afitar un verdaderu sentíu de la llealtá haza un Poder europeú nacional (Europa como Nación y non como ensame de mercaderes nin como meru ensame de bayura de pequenes naciones) y un patriotismu arraigáu no llocal y rexonal (la Patria como raigañu del home). Pa ser llibres de los imperialismos universalistes, Europa debe ser una auténtica nación qu´atrope a pueblos hermanos, caún d´ellos restituíu arguyosamente na so esencia cultural y histórica.

Fonte: Finxospedia