Este es un blog destinado a recopilar notas y artículos referidos al Nacionalismo Asturiano, su pasado, su presente y su futuro. Asturies como País. Asturies como nacionalidad histórica.
BARRUNTOS Y CONDICIONES PA UN ENSAYU ASTURIANU EN CLAVE NACIONAL
Ponencia presentada na Xunta d´Escritores Asturianos (2012)
Carlos X. Blanco
L´ensayu en llingua asturiana tien que dexar atrás el victimismu. Col victimismu –y esto val igual pa la esfera de l´aición política nacionaliega pa la xera de la reivindicación cívica pola Oficialidá- empobinamos namás qu´a nenyures. La víctima pide, masoquistamente, que-y den. L´ensayu en llingua asturiana tien de ser un tambor de guerra, una punta de llanza, un ariete de conciencies.
¿Cómo s´algama eso?
De mano: escribiendo. Escribiendo col corazón na mano y ensin pretender, como pretendieron tantos va unos años, vivir d´ello. Noxu dan los fracasaos de la “profesionalización de la llingua”. Cola Oficialidá, mañana otru día, quiciás surda una bona estaya de plumes series, rigoroses, perclares (masque cuasi nunca xeniales) que vivan – a lo menos en parte- del foliu que manchen. La Oficialidá, y más entá la Normalidá de la Llingua Asturiana, va danos esi plantel de profesionales. Pero nun ye esto lo fundamental. A min nun me interesa muncho el problema de cómo socesives xeneraciones de mocinos universitarios, con vocación de periodista, opinólogu y bufón de la política provincial son quién a buscase un platu fabes pa tirar p´alantre. Sí: tienen drechu a buscar trabayu o prestixu per aciu la Llingua Asturiana. Toa llingua respetada ye –ente otres munches coses- negociu, vehículu d´ambiciones personales, cucharón pa enllenar banduyos, y demás. Pero nun ye esto lo fundamental.
Teo pa min, y esto ye una xeneralización inxusta pa con dalguna individualidá, que munchos escritorinos más mozos, con nacencia posterior a 1980, abellugaron esperances valeres sobre una Oficialidá a la vuelta la esquina. Un diploma d´epecialista en llingua, un títulu de Filoloxía y la memorización d´un “iguador ortográficu” del so castellán conxénitu, yá yeren preseos bastantes pa facer carrera nel mundín del bable. Cola espublización d´un llibrín o dos, debidamente sobvencionaos pol Réxime, col nihil obstat de la progresía imperante nes instituciones de la Provincia, siguieron llevantando la bandera d´una llingua arrequexada como la nuesa, enfotaos y enfataos en ser los gallos de la quintana. “Nós” –pensaron- “somos estremaos: tenemos creatividá y tamos abiertos al mundu. El modelu de conceyu Bable ye, nel fondu, un resclavu del vieyu rexonalismu. Ye bable de madreña y gaita. Ye bable zarráu a sigo mesmo. Nós abrímonos al mundu, a la Cosmópolis”. Y en parte, teníen razón. En parte, non.
Pues ye que la Quintana Astur ye perprobe, y el techu y la muria salen al camín d´esi mozu enllenu coroques que naguaba por anovar la lliteratura y salvar la llingua embolsando al empar una reputación d´”intelectual” y sicasí, semar pa vivir mañana otru día de la lletra impreso. Porque la realidá murnia ye que s´escribieron (y escriben) llibros yá muertos al salir d´imprenta. Llibros esgonciaos yá dende´l momentu mesmu nel que foron concebíos.
Conceyu Bable xunió la lliteratura asturiana al nacionalismu. Al empar, Conceyu Bable inventó´l nacionalismu asturianu. La “Cosmópolis” de poetastros hiperintelectualizaos que siguió bien llueu nun fizo otro que tornar a un fundimientu y albuertu de lo que tien de ser un enfotu nacionalista ente lliteratos. Cuando taba naciendo un nacionalismu asturianu, toa una xeneración de “dignificadores” de la llingua nacida precisamente coles calendes del posmodernismu y el “pensamientu débil”, educada nun sistema d´enseñu que tamién taba dando les sos boquiaes nesti bárbaru Estáu Español, aportó y mató al neñu a los pocos años de nacer. Mató una lliteratura asturiana en clave nacional, de la que yo quiero, agora, facevos unos barruntos y camientos, asina como un analís de les condiciones obxetives que riquen la espolleta de tala cosa.
Porque lo que nun hai ye una Lliteratura Asturiana en clave nacional.
Nótase esto que digo, sobremanera, nel xéneru del ensayu. Nun se dan les condiciones pa un ensayu en clave nacional. Hai perpocos fitos que xalonen el camín de la construcción d´un ensayu en clave nacional. Xuan Xosé Sánchez-Vicente, que tantes coses echó a andar, como´l propiu Conceyu Bable, ye ún de los pocos ensayistes del País. La so obra La cultura asturiana: dialéctica, narrática y proyectabilidá (1999) ye una de les poques reflexones filosófiques qu´un asturianu asoleyara sobre la so propia nación y na so propia llingua. D´otra banda, Xaviel Vilareyo, nel llibru Los ámbitos de la Nación Asturiana (2008), encaria, ensin prexuicios, el problema territorial d´Asturies que, xunto al tapecimientu de la so llingua, los sos vezos, la hestoria d´independencia política y el so específicu drechu tradicional, ye ún de los pegoyos del nuestru autorreconocimientu como Nación. Ye obligao, amás, citar Pegoyos y muruecos d´Asturies, de José Carlos Loredo Narciandi. Poques obres más son dignes de mención.
Lo que carauteriza al ensayista asturianu en clave nacional ye la so independencia de criteriu, la valentía de pensar al marxe d´un duernu, la falta absoluta de sintonía con ciertu stablishment provincial qu´entiende qu´Asturies ye namás qu´una provincia de Castiella, d´España, del Mundu, una estaya alministrativa dende la que falar en nome de la Humanidá. Y escribir en contra d´esta nomenklatura ye difícil y abegoso nel País Asturianu. Ye un llabor enguedeyao y cargáu d´obleros, zancadielles. Talmente ye como vivir en tierra d´infieles y caminar esnudu ente artos.
Infieles, y artos con espines, y caínes que xuren la muerte d´abeles: eso somos los asturianos cuando hai xente de valir ente nós. Como nun ye cosa de cometer un asesinatu real, cométese otru de tipu simbólicu: el silenciu, la mofla, l´esiliu. Escribir qu´Asturies ye nación y que necesitamos una llingua reintegrada, un territoriu reintegráu, una soberanía devuelta, un reconocimientu internacional, escribir eso, ye anguaño tar espuestu al fusilamientu intelectual.
Lo cómodo y cenciello ye empobinar pela tanxente. Escribir histories insustanciales que lo mesmo podíen tar vertíes al castellanu qu´al xaponés. Lo cenciello ye entender que l´ensayu n´asturianu ye cualesquier castra de prosa (periodística, especialista, profesional) tornada al asturianu. Nun m´interesa muncho el Códigu Civil tornáu al asturianu, masque meyor ye qu´haiga versión a que nun esista. Trátase de pensar n´asturianu. Trátase de pensar –una, milenta vegaes- qué somos nós, como fíos y herederos d´una civilización.
La civilización asturiana necesita filósofos, non solo escritores. Necesita cerebros qu´acueyan nes coraes de la so alma tou esi específicu sentir norteñu que mos carauteriza. Quiero emplegar adréi la pallabra civilización pa referime a Asturies. Davezu fálase namái que de “cultura” con un aquello d´envís museísticu, etnográficu. Asturies ye más qu´una unidá orgánica de castra etnográfica, digna de ser defendida tres les aséptiques vitrines de museos y centros d´atraición pa turistes. Tampoco somos seres póstumos. Nun cabe falar de la Cultura Asturiana nun sen asemeyáu al de Cultura Etrusca o Tartésica.
Fálase de civilización asturiana na midida na que ye una de les más vieyes d´Europa, al entamu integrada na Celtia y depués na Llatinidá. Fálase de civilización asturiana na midida na que somos un pueblu vieyu y que nun se llendó a poblar y criar cultura nun reducíu solar qu´agora tovía (con reducciones y furtos escandalosos) habitamos. Hai que tener en cuenta que la Península Ibérica foi recuperada pala Occidentalidá gracies al Reinu Asturianu que, dende´l sieglu VIII proxeutóse dica´l sur, y europeizó la meseta y la fastera meridional hasta acabar col Al-andalus. Nun s´entienden Lleón, Portugal, Castiella y hasta´l País Vascu ensin el llabor de dieldu y semiente d´Asturies.
Teniendo llingua propia, historia milenaria y llabor de partu de pueblos, decisivu na Hestoria d´Occidente, ¿por qué nun hai afitada una escritura militante, una escritura miliciana? Too escomenzó haza 1970 y Conceyu Bable. Y too morrió depués, hasta´l puntu que podemos dicir qu´a fecha de güei nun hai Nacionalismu Asturianu. Y esi Nacionalismu Asturianu ye un pegoyu d´una Ensayística n´Asturianu como parte esencial d´una lliteratura en clave nacional.
La Muerte del modelu de Conceyu Bable
Les causes del fracasu del nacionalismu astur son fondes, vienen de llueñe y esixen un estensu conocimientu de la realidá asturiana. Inda dientro d´eses causes ha figurar una de les les principales: la falta de conocimientu de la propia realidá nacional que nós, los nativos, cadecemos crónicamente. Auto-conocimientu. Eso ye lo que falta. Esti ye´l problema.
Nun se m´escapa que los políticos que quieren representanos en clave nacional son pocos, ensin medios, tapecíos polos medios de comunicación masiva y qu´amás llancen los sos discursos a una sociedá que-yos da´l llombu. Pero esos discursos cadecen de categoríes nidies pa faer l´análisis, y les categoríes que remanen, si les hai, son categoríes dafechu importaes d´otres realidaes nacionales.
Ye una categoría vieya ya importada esta de la reivindicación llingüística. Dacuando paez que lo que se noma “asturianismu” nel sen más llongu y pandu nun ye otro que ser favoratibles a dalguna triba de Oficialidá de la Llingua Asturiana. Pocu pegoyu ye esi pa xuncir fuerces. Les manifestaciones pola Oficialidá van siendo más murnies, faltes d´idees, y nelles reina la cascancia masque tean convocaes y organizaes col mesmu enfotu y vigor de siempres, pero la rempuesta va afloxando. Esti movimientu cívicu –perimportante y meritoriu per se- nun ye abondo pa que los asturianistes se xunten pa dalgo más, ya inda ansí, siempres hai fatos que frañen la unidá coles sos banderes, sos glayíos de “¡Independencia!” y demás salíes de tonu. Pero, d´otra banda, bastante fama de “pensar namás que na llingua” ye la que ganaron los micropartíos asturianistes dende les dómines de Conceyu Bable. Los más economicistes dicen que´l pleitu de la llingua ye, namás, un “pleitu cultural”, o sía, un apueste ornamental y un pocu señardosu. Falso, falso, falso, pero ye una falsedá que na práutica acabó caltriando na población asturiana, nel automatismu mental de los non convencíos, de los “castellanizaos” que por embargu tamién son asturianos. Asina d´eficaz se fai la marxinación de la nuestra reivindicación. Asina y cola falta de compromisu de muncha la xente que se diz “asturianista”. Dalguna esperiencia personal y directa teo yo: en xeneral –siamos sinceros- nos “defensores” de la llingua nun hai sobraes ganes de trabayar gratis nin chapeta pa defender lo propio, la propia llingua. Ye la triste realidá, y tenemos lo que mos merecemos.
El casu ye que la xente asturiano yá nun odia (en xeneral) la so llingua llariega pero sigue viéndola como obxetu d´un museu. Pasemos del Muséu Etnográficu y Arqueolóxicu al Muséu de les Guapures Escelses. Pero nel Muséu. Y embalsamaos.
Esti modelu “Conceyu Bable” yá morrió, talo como muerre un brazu separtáu del cuerpu. Yá nun se ven los texíos coxuntivos, les febres qu´amiesten el brazu de la Llingua nacional a tou un Proxeutu de Rexeneración Nacional, como nun entamu se pensó. Ente la Oficialidá (puramente llingüística) y el Proxeutu de Pais, hai namás qu´aire, dacuando fumu, y munches veces lloria pura y dura. El Proxeutu económicu-social de País nun s´improvisa namá arrincando, en plan bayurón, d´un “Bable nes Escueles!” o d´una “Oficialidá Yá!”. Les Campañes cíviques, tan meritories como esa de “Doi la cara”, etc, sumen decenes de miles, sí, pero son poco más que pacetibles recordatorios d´una fe qu´una vez se tuvo pero que yá nun mueve Montañes. Y los asturianos hemos mover montañes. Cinco sieglos d´aculturación son Montes abondo altos p´atopanos nós. Nun sé ónde vamos “sensibilizando” peles buenes a una masa tan indiferente como ye bona parte de la sociedá d´Asturies. Esa masa que ve que la Llingua nun da de comer nin tampocu-y da l´autoestima que necesita. L´euskera y el catalán sí tán dando de comer y sí ufren autoestima a los falantes. L´asturianu como llingua yá tá siendo autoconsciente, un fitu históricu, pero nun sabe llevantase de la cama y nun ye a mover los brazos al tar desconectada d´un cuerpu baldáu que necesitaba llevantase y movese, dar guelpes, grayar y dicir “¡Vivo!” ¿Damos voz a un muertu? ¿Qué ta moriendo, la llingua o Asturies mesma?
La llingua fue´l nuesu brazu pa salir un pocu d´esta tumba que Castiella nos preparó. Pero esti brazu tan separtáu del cuerpu social del Pueblu Astur yá ta gangrenando. La necrosis nótase a les dos veres: nel brazu y nel cuerpu. ¿Y qué dicir del cuerpu? D´Asturies nun queda´l cuerpu d´un home sanu, enteru, arrechu. Ye un cuerpu con prótesi. Un brazu de fierro, una rodía de plásticu, unes piernes de madera qu´acoxen. El celebru ye d´aluminio importáu. L´Asturies “moderna” ye más fea y cazurra que la que tuvieron los nuesos mayores, pero habrá qu´apechugar con ella. Habrá que la defender. Pa ello, nun sé, había que tender pontes nun yá solo ente grupúsculos autistes ya cégaros que nun quieren ver nin reconocer la ceguera (¡hai mazcayu que vio ésitu nes pasaes Elecciones, inda ente esos que sacaron los gloriosos 1500 votos!). La gran ponte cruza pencima la indiferencia y coneuta´l brazu de la Reivindicación Llingüística col Gran Cuerpu de l'Asturies esgonciada, que tien que zarrar les firíes del industrialismu, del sindicalismu de los millonarios proletarios, del progresismu que nos tercermundializa, de les Lleendes Urbanes que se desasturianicen, de la falta de críes y críos, de la imposibilidá de reproducise socialmente esta Totalidá Social qu´empobina, vía xeriátricu, al Cementeriu.
Hai una dialéctica ente ser [Nación] en sí y ser [Nación] pa sí.
Dos milenios va qu´un Pueblu y un Territoriu lluchen como Nación en sí: Asturies.
Una Nación en sí ye una nación en potencia de ser más de lo que ye, potencialidá de ser Estáu, y de ser modelu pa otros pueblos.
Nesi sele trescurrir de los sieglos la nuestra Nación algamó formes estatales d´esistencia. Y fue, pre-modernamente, Nación pa sí: Reinu y Principáu.
Nesos dos milenios, de magar les lluches contra Roma hasta la conquista de gran parte del orbe andalusí (esa avanzada africana y oriental nel Occidente Europeu), pasando per toles resistencies contra Castiella (toa una mecigaya ésta, al entamu, d´elementos vasco-cántabros con mozárabes y semites) Asturies como Nación en sí fue siempre guerrera y arguyosa de la so castra.
Pero fue mester tocar fondu, llegar a ser los parias y los negros del Reinu castellán ya hispanu, pa que los descendientes xenuinos d´aquellos astures de fierru y bravén lleguáramos a tener conciencia de ser Nación pa Sí. Tamos n´ello.
Sieglos nos que fuimos aguadores en Madril, acémiles de carga pa una nobleza castellana fecha con conversos. Tiempos nos qu´unviemos ames de cría roxes y nidies pa dar llechi y emblanquecer a prietos vástagos de marqueses y condes, esos advenedizos “grandes d´España”. Sieglos pa llegar a ser vistos y trataos como burros que van a segar a Castiella por dos riales. Sieglos llargos de ser a la fuerza “lleendes urbanes” pa que nos esploten en llonxanes capitales, y mos faigan de menos, como “simpáticos y entrañables” norteños va tiempu faltos de rabalbu. Ye muncha hestoria d´humildación y vergoña, la necesaria pa entamar otra dómina. Al tocar fondu, dialécticamente, somos quién a remontar. A escomencipiar a facelo, y a facelo bien, arrexuntando les estremaes sensibilidaes nacionales.
La dómina de ser Nación pa sí: de conquista del nuesu espaciu centráu na Europa. Non na Iberia africana y sureña. La gueta del nuestru propiu centru xeopolíticu, del nuestru propiu ámbitu.
Los pueblos estrémense porque nun s´entienden. El verdaderu diálogu de los Pueblos y les Naciones ye per aciu de fronteres, masque sían invisibles. Respetar les llindes étniques d´una Nación ye respetala como concreición de la Humanidá que ye, comprendela. Los asturianos tenemos que facenos respetar. Poner finxos d´un nacionalismu asturianu ye poner pegoyos del respetu. Respetu a lo que somos.
Quiero qu´España nos respete. Qu´Europa sepa que somos, que tamos, que tenemos daqué que dar al mundu otra vuelta. Pa ello ye mester l´autorrespetu. Conocer y respetar los símbolos de nuestra nación. Un coru de monxines catequizaes col llibru roxu de Mao o col “Diálogu de les Civilizaciones” de Zapatero –nun sé mui bien- axorícense cola Cruz de la Victoria, col simbolismu telúricu de la Santina, col amor fonderu a la bandera azul col alfa y l´omega, col fechu profundu mesmu de que ser asturianu ye ser representante d´una antigua civilización europea que dio la espalda al islam y a otros proyeutos universalistes.
Sabéis que, d´una espiritualidá recuperada, prefiero el vieyu paganismu de mios mayores que´l xudeocristianismu de Torquemada (antepasáu católicu de los Jomeinis y los talibán). Nun siamos como les monxines que se ponen coloraes cuando toquen temes tabú. Nun fagamos el xuegu al españolismu arrenunciando a les nuestres tradiciones. Si, total, fasta´l mesmu Donoso Cortés ignoraba lo de Cuadonga y dicía qu´Europa fuera salvada polos francos de Carlos Martel. Pa España, nun vos engañeis, el cuadonguismu ye xida o coartada pa piesllar boques n´Asturies. Ellos yá tienen el Rocío y el Pilar.
Cuadonga ye mia, ye nuestra. De los asturianos y naide más.
¿Por qué los tiempos d´Asturies son tan aselaos?
El ritmu de los cambios ye murniu. La sociedá apigaza. El puxu de los nuestros reclamos paez que malamente espolleta.
Somos sociedá avieyada. De ser un estáu, sedríamos de los más avieyaos d´Europa y, poro, del mundu. Somos una sociedá reconvertida, y eso debémos-ylo a la FSA, al so cobarde, mazcayu y tarrecible espíritu cipayu. “Cipayu”, ha lleese: cuando nuna sociedá dafechu colonizada hai continxentes indíxenes dimpuestos a masacrar a los de so. De magar entró la Democracia Formal, 1978, Asturies vivió en permanente crisis. Iguando los llastres que´l franquismu autárquicu mos dexó nel País: xigantismu industrial, planificación económica a escala española y non asturiana, desconexón d´ella pa col campu, estroza de la esencia paisaxística y medioambiental del País…recolocando too eso, una gran llábana pesara so nós, y nesto llevamos 30 años. Nunca nun tuvimos p´allegríes. Nunca tuvimos tiempu pa pensar en seriu qué somos los astures.
Paez ser que con tantes firíes, nun hubo tiempu pal autoconocimientu. ¿Qué faer cola Llingua llariega?
Primero taben los “sensatos y pensantes”, el stablishment periodísticu y opináticu, la mafia nepotista de la Universidá, la derecha y la izquierda más abrazaes que nunca na tema llingüística.
Segundo, taben les direitrices madrilanes: había qu´aparar la dinámica centrífuga del Estáu.
Tercero, la propia sociedá asturiana llevaba bien d´años provincializada. Dende los tiempos del lliberalismu decimonónicu, faer carrera pa un asturianu yera tomar el carreru de Madrid. N´Uviéu y “provincia” namás quedaba´l vexetar, el faer como que la Historia nun pasaba. Lo único qu´amosaba, supuestamente, que´l tiempu históricu sí pasaba yera´l Movimientu Obreru. Pero vimos a una Asturies incorporándose a carrenderes a una Revolución Industrial na que´l capital yera fuyidizu en forma, la burguesía foriata en gran parte, y los porgüeyos yeren xeostratéxicos (pal Reinu) más que llucrativos (masque nel capitalismu nunca nun dexen de ser llucrativos por definición): toes eses foron les tóniques que marcaron diferencies pa con otres zones del Reinu.
Too esto, esi industrialismu anómalu, dafechu colonial, contribuyó a allonxanos del autoconocimientu. Los asturianos llevamos sieglos alministraos dende fuera o con xente nativo de clara mentalidá provincialista, cuando non cipaya. La economía, en cuantes sal de los carreros de l´autosuficiencia y del so desendolcu natural, empobina a la Xeostratexa d´un Estáu pocu homoxeneu y de castra centralista y mediterránea. La demografía, una y bones nun se pue pensar en conductes heroiques y voluntaristes per parte de la sociedá tomada como un Tou, amuesa la muerte numbérica de la Nación, una nación que nun se reproduz y sigue unviando emigrantes envede recibilos.
La llingua y el pensamientu vernáculu al rodiu de quiénes somos ensin tantos caciplamientos “superestructurales”, ye dicir, impuestos dende instancies madrilanes, puen reorientar la nuestra vida futura. Pa eso ye mester dir caltriando mensaxes d´autoestima, d´amor polo propio, tantu nes instituciones educatives como nes cases conceyu y auquier se preparen futures conciencies, yá avezaes a vivir ensin provincianismu, ensin mentalidá colonial. Ye necesaria una pedagoxía en clave asturiana, ensin marcianismu. Por exemplu dando usu normal al asturianu, falando de país y de nación con naturalidá, marcando les distancies pa colo español y lo españolizante ensin tics de vasquismu abertzale, construyendo opciones polítiques realistes y que dean sensación de seriedá y compromisu pa colos males específicos d´Asturies.
Cuadonguismu
La Historia ye una ciencia fecha d´interpretaciones. La Historia ye esencialmente hermenéutica. Inda nel casu del materialismu históricu, onde me presta allugame tanto no metodolóxico como no ontolóxico, nun hai otro qu´hermenéutica de les dómines, de les fazañes, de los fechos sociales, de les rellaciones de producción. Nada comparto del envís economicista, nada del determinismu mecánicu de dellos marxistes de catecismu. Y menos entá comparto´l “materialismu” de Gustavo Bueno, qu´amosó públicamente so inorancia grave de la dialéctica al comparar, na obra El Mito de la Cultura, una totalidá social con una planta p'asina pescudar les rellaciones “termodinámiques” ente base y sobrestructura (yá nun digo “supracadarma” pa safame de los académicos de la llingua). Cuando lleí eso al señor rioxán, yá supi yo qu´elli de dialéctica andaba un pocu coxu.
Hermenéutica ye considerar cada dómina como un tramu “de llarga duración” que se rixe por lleis propies. El feudalismu tuvo lleis estremaes del capitalismu, y dambos los dos del esclavismu. Metódicamente estes categoríes impliquen una dosis pergrande d´inconmensurabilidá ente los estremaos Moos de Producción. Podemos estudiar el pasu d´ún al otru, la transición, pero non entender ensembre ún al traviés de los prismes ópticos d´otru.
Pero continuidaes, haber hailes. Defendiera la continuidá entes astures y asturianos. Defendiera per escrito la continuidá ente l´Asturorum Regnum y l´Asturies d´anguañó. La Historia empírica, documental, positiva, ye muy probe n´información sobro los nuestros antepasaos. Pero, pesie a too, impónse agora una Filosofía de la Historia. Una filosofía que refugue´l prisma del Cuadonguismu, una re-visión del nuesu Pasáu dende otres perspeutives y coordenaes.
Hai, polo menos, tres puntos a superar.
Hai más entrugues. Yo convido a pensar Asturies ensin les gafes covadonguistes, y con una Filosofía de la Historia que nos permita saber quién somos. Somos distintos, obxetivamente y eso tien unos raigones perfondos. Vienen d´un pínfanu escuru que se noma “Historia”, y ye esa Clío la que nos fai ser como somos güei.
Nun podemos nin queremos tornar a l´Alta Dómina Media. Pero sí podemos rescatar la nuesa identidá. Ente tantu babayu que quier quitar la Cruz de la nuesa bandera, o refugar aquellos sieglos por ser “monárquicos” y por nun esistir el proletariáu universal nin HUNOSA tampocu, pensemos un pocu d´au vinimos: del fierru, de la espada, del “tirar p´alantre”. Enantes de la llucha de clases, pero tamién inxería nella cuando ésta esistió, tamién hebo llucha de pueblos, afirmación de naciones, conquista del territoriu, ganes de “ser” y de siguir siendo. Agora somos pequeños porque nos dexamos pegar, y porque ponemos la otra mexella y hasta´l traseru. Amamos al enemigu y odiamos a la Madre, a la Tierra, a la Patria. Ponemos el llombu al enemigu. Ponémoslu cuando vienen los borbones a la Asturies vencida y hai “nacionalistes” que nun gorgutien. Ponémoslu cuando se ríen de la llingua, del país, de la hestoria, y tolos que se dicen “ASTURIANOS” cola bocona grande, azorronen y callen.
Nun tenemos igua si nun sabemos amestar la llucha de clases a la llucha de pueblos.
El mitu goticista
De mitos quería falar güei, otra vuelta. Y a riesgu de ser pesáu col tema del goticismu..
Un artículu d´Ingmar Söhrman (Universidá de Goteborg), “Ecos de la patria goda. El orígen de dos naciones”, alquier muncha relevancia, pamidea, al rodiu del tema del goticismu como ideoloxía que tapeció, d´una banda, la identidá de los astures y, d´otra, sirvió paradóxicamente como sida diferencialista pa los pueblos del norte peninsular xustamente cuando éstos diben centrípetamente a estrellase contra la Monarquía unitaria de los Austries.
La realidá ye dialéutica, y esi doble xuegu del goticismu tenemos que lo pescudar mui bien, porque nun ye ésta una ideoloxía desactiva, una antigualla. Ye la esencia del mitu fundador d´España. Tou nacionalismu necesita como´l comer un Mitu Fundador. Y España, l´españolismu, tuvo mester d´esi mitu. Dellos pruyimientos del “asturianismu” y del “progresismu” refuguen falar de don Pelayo, la Cruz de la Victoria y Cuadonga por cuenta de qu´asumen, talmente como indíxenes colonizaos, qu´esos símbolos nun son suyos, que son tarrecibles, que son dafechu españoles. Error grave pal nacionalismu astur: la so obligación ha ser siempre recuperar los sos propios símbolos fundadores y, en xeneral, la propia hestoria.
Ye curioso lo que nos cuenta Söhrman. De los godos, como en xeneral los xermanos (Tácito, por exemplo) hai un rellatu ambiguu. D´una banda “bárbaros”. Pero valientes, bonos guerreros, “nobles” (los “bonos”) énte la Roma decadente, fríngole. Los godos, probatiblemente, surdieron del sur de Suecia y llegaron a la península ibérica –ente otros llugares mui estremaos- onde afincaron como amos y señores, xunta suevos y otros pueblos menos estables políticamente. Xordanes, Sidoru de Sevilla, Alfonsu´l Sabiu, Ximénez de Rada…van esbocexando un rellatu d´esti pueblu nórdicu que domina la península ibérica en parte dende´l sieglu V.
En parte, porque hai que ver qué escosos son los resclavos de la Gothia n´Asturies. Yo pa min que nunca la dominaron, pues ye bien probe lo que s´atopó n´arqueoloxía, toponimia y demás sobre esti pueblu que solo “teóricamente” reinó nel nuesu país astur. Lo más curioso del mitu goticista ye que con tan poques evidencies de presencia goda, o de dominiu real sobre Asturies, fora´l nuestru Reinu, aniciáu por Pelayu en Cuadonga, y más formalmente por Alfonsu II, el paradigma de la “restauración goda”. ¿Cómo ye eso? Resulta raro qu´un pueblu que yá pal sieglu VIII yera la más pura decadencia, y que se convertió al islam en masa cola fin de nun perder privilexos, llegando inda a crear “comunidaes autónomes” como la de Todmir en Murcia, esi mesmu pueblu que se rindió al moru, fuera a abellugase a los Montes Astures pa “reconquistar” lo que tan fácilmente perdieron más al sur, unos pocos años antes.
Les fontes medievales citaes arriba yá daben del sangre godu una valoración suprema, como fonte de la nobleza castellana. La cosa estremóse más entá, según diz esti profesor de Goteborg, cuando Carlos V pretende facer llexítimu'l so ideariu imperial (non desconocíu polos reis castellanos, que se queríen socesores de Roma y Toledo) y anubrir los emerxentes signos de descontentu (bien remanaos yá por Isabel y Fernando, por ciertu) del Norte.
Naz entós, na Edá Moderna, el tubalismu (el mitu de Túbal como aniciu de la castra de los vascos), mentes que los astures acabemos “engañaos” y “autoengañaos” col nuestru mitu goticista. Asturies como fonte de toa nobleza por ser cuna de los godos, godos refuxaos nel Auseva. Como muncho, los astures “ficimos rellenu” p´aidar a esa élite irredenta, per se noble, que nun sé qué tendría de bono como castra a eses altures, si la mayoría foron “chaqueteros” y camudaron en mahometanos pa siguir viviendo bien.
Ye curioso saber que tamién en Suecia'l mitu goticista tuvo predicamentu. Los diplomáticos españoles de la época de los Austries quixeron sacar a los suecos de la contrarreforma, y a la hora d´entamar bones rellaciones buscóse nesi mitu goticista una hermandá ente dos periferies, que darréu l´afrancesamientu de les cortes europees y del declive de la española amatagó. Pero´l romanticismu del XIX fizo que´l goticismu en Suecia alicara, y nun ye estraño que los eruditos escandinavos vean a don Pelayu como unu de los suyos, cosa que munchos españolistes de la mesma dómina preferíen pela cueta arrequexar. Yá la Pilarica, Agustina d´Aragón, el dos de Mayu, el Rocío, inda´l mitu del vascu como “protoespañol” esencial y primixeniu vinieron a dexar más a un llau a Pelayu, esi princeps de los astures.
La intuición de que baxo l´asfaltu de Xixón, o tres l´horru aldeanu, o ente los pedreros del Cantábricu, alita entá una Nación, una Nación sorda a so propia alma, que solo cola música, o con cachos de poemes mal recordaos, sabe de sigo mesma, ye´l puntu d´arrinque pa una recuperación de la nuestra historia. Paez un entamu probe, pero ye entamu.
Quixeron facenos pasar por cuna d´un pueblu ayenu, precisamente polos fechos diferenciales que testimonien la esistencia d´una nación (un ethnos) distinta de tola redolada ibérica. Los astures pasemos a ser, sobre manera pa Castiella, non un Pueblu sinón suxetu borráu nun Territoriu: Asturies la cuna d´España. Nun quixeron ver al chiquillu, quixeron ver la naturaleza mineral de la so “reconquista”: cueva, montes, abellugu, trubiecu. Pero´l rapacín, nós, fuimos “borraos” de la escritura de la historia. El suxetu de la Rebelión desapaez, y solamente quixeron saber de nós en calidá d´escenariu, de basa inerte o pasiva d´una identidá ayena, la Castellana, esencialmente mestiza, medio-oriental, que naguaba por presentase con credenciales xermániques dando´l llombu al Norte d´onde dixo nacer.
La contradicción fundamental d´”España” ta n´Asturies, y voi concluyendo. Podrán dixebrase un día los vascos o los catalanes, y nun va pasar nada. El mitu de lo “español” siguirá alitando en Castiella, Andalucía, Llevante, onde sía. Pero si un día los astures volvemos a ser rebeldes (y esi día llega, si la intuición de lo nacional nun muerre, pues ye una posibilidá siempres, esto ye una realidá a la que-y falta recorríu), ún de los pegoyos del Estáu arranando por ser nación, España, viense abaxo. D´ehí la importancia histórica de ser nacionalista asturianu: apaeces dacuando como un llocu ente castellanos y, llaceriosamente, ente los propios asturianos. Pero la to mesma esistencia, el que tu sías asina y tengan que te dexar vivu, ye la dinamita mesma del xigante estatal, que n´Asturies tien, siempre tuvo, los sos pies de barru. L´asturianu nun ye oficial entá precisamente por eso. Ye una guantada pa España que sigamos falando la mesma llingua milenaria de nuestros mayores, y non namás español depués de tantos sieglos de ser supuestu trubiecu d´España.
Nun hemos escaecer esto.
Realismu: l´actitú más patriótica
El nacionalismu asturianu ha ser realista o nun hai nacionalismu asturianu. Eso nun quier dicir que nun se tenga qu´acolumbrar un futuru, definir un espaciu ideolóxicu y cultural onde se mover, diseñar estratexes amplies y ambiciones altes pala década ya inda pal sieglu que vien. Pero hai urxencies. Una urxencia, ensin ser electoralista, ye algamar representación electoral na Xunta y nos conceyos per aciu d´una Xuntanza de toes o la mayor parte de les fuerces asturianes (nacionalistes y asturianistes), col envís d´aportar mensaxes identitarios y alternativos a la sociedá astur.
La representación institucional d´una opción política ye esencial pal nacionalista lliberal, lóxicamente, y ye tamién perimportante pal nacionalismu revolucionariu, pues, como dicía Lenin, los parllamentos puen ser usaos como plataformes d´axitación popular y como altavoces de la voluntá del Pueblu. Lo contrario ye anarquismu anti-sistema. O sía, que nun veo discusión granible nesti asuntu: nacionalismu moderáu y nacionalismu radical han compartir el porgüeyu de dar voz –na Xunta y nos conceyos- a la llingua asturiana y en pro de la llingua y la identidá asturiana p´asina reclamar el máximu autogobiernu nacional, de mano, dientro del Reinu d´España, siempre enantes de ser quien a pasar a reivindicaciones más ambicioses poles que munchos naguamos pero que tenemos qu´apostalgar enantes d´enanchar la base social identitaria).
El nacionalismu asturianu tien grande necesidá de normalizase como opción política. Una opción política que, en sabiéndose minoritaria anguaño, ye una opción real si hai amestadura de fuerces. Una opción qu´arriquez la maltratada Asturies, nación que rastra un déficit democráticu dende 1934, polo menos, y dende 1978, ensin dulda denguna.
Les minoríes son quien a condicionar la política de dinosauriu y apisonadora de los grandes partíos sucursalistes. Les minoríes siempre dan variedá d´opciones y puntos de güeye a la ciudadanía. Les minoríes siempre son la basa pa llegar a ser mayoríes. Les minoríes son representación d´una sociedá dinámica, plural, crítica, que refuga dafechu la uniformización. Con tanta criminalización que´l´españolismu uniformista llanza contra los nacionalismos “periféricos”, ye hora de saber “capitalizar” el llau positivu del nacionalismu ensin estáu, como ye l´asturianu: la posibilidá efeutiva de poder llevantar una torga a la rueda y al mecanismu clientelar, mafiosu y despóticu del Réxime llantáu n´Asturies. Una torga y una palanca pa llevantar una Asturies nueva, la que vive sapozada ya inda secuestrada poles sucursales d´España.
Porque la Cultura Asturiana ta secuestrada: quieren llendala per aciu de la contratación y cooptación clientelar de cuatro filólogos, cuatro escritores, cuatro cantamañanes. Ye la versión ampliada del IDEA franquista. Unos coros y dances flocloristes como los de la vieya Diputación Provincial, masque con unos presupuestos mayores y con un toque de “progresismu anti-identitariu” que sirve de maraviya a los porgüeyos del Poder. Cultura Asturiana ye, pa dellos, un requexu folclóricu onde añerar un garrapiellu d´intelectualoides a los que-yos falten ganes de dir al trabayu o preparar oposiciones. Nun miren a los espacios reales d´asturianidá que dafechu esisten Cultura Asturiana, Cultura que ye un mou de vida: vezos, conceiciones del mundu, formes d´espresase y de siguir siendo. El mundu asturianu quier siguir esistiendo y por eso quier espresase musical, lliteraria, festiva, deportivamente. Más alló de preguntase por qué nun hai perres pal asturiano, por qué nun hai clientes pa lo asturiano, por qué nun defendemos más lo nuestro, etc., más alló de los quexumes atristayaos de siempre (que podemos lleer nos paniaguaos bbalistes que suañaben con un Nobel o dalgo asemeyao), yo quiero dir al raigón del asuntu: por qué lo asturiano que dafechu hai, por qué l´asturianismu que dafechu trabaya y trabaya bien, nun sal del so secuestru mediáticu y del tapecimientu encabronáu que´l Réxime prautica sistemáticamente. Les telarañes de l´asturfobia tenémosles que sascudir toos, inda los nacionalistes, ye dicir, toos aquellos qu´amamos la nuestra forma específica de ser como asturianos. Y eso rique d´una intelixencia a vista de páxaru, panorámica: un pautu de non agresión ente los que nun viven cola tiesta metida na palangana. Un pautu constructivu pa con esa opción asturiana dafechu, y un pautu belicosu p´aparar los pies al que s´amuese sádicu pa cola nuestra cultura. Pasaron los tiempos de les llimosnes. Hai que dir a polos sádicos. Y nesto, l´ensayu en llingua asturiana y escritu en clave nacional tien que ser –vuelvo a repetir- un tambor de guerra y una punta de llanza.
Munches vegaes, dende ámbitos ayenos critícase –con della razón- a “los del bable” por preocupase namái que por esi tema, descuidando la descomanada agresión y regresión económico-social que cadez Asturies dende cuantayá. Pero tamién ye verdá qu´hai un tonu esquizofrénicu nesi nacionalismu ensin nacionalistes que-y tien medrana a la identidá, al ethnos astur. Esta “mente dixebrada”, esta llocura que nos aquexa como Movimientu de Lliberación, nun ye tan grande si se quitaren del cuadru d´escena trés o cuatro marionetes con filos llargos que proceden d´IU, fundamentalmente. Nun hai tanta dixebra como paez. Lo que pasa ye, como diz dacuando Sánchez-Vicente, que l´arcaísmu mental d´Asturies espeya enforma l´arcaísmu económicu-social nel que nos metimos. Como emigráu, cuando torno al País, detecto xustamente esi arcaísmu que bien poco se correspuende coles nuestres potencialidaes. La mafia, les palanganes, la falta d´autoestima coleutiva, la situación colonialista na que tamos, la bayura de xente que tien trabayu, bona pensión y enchufes pa los fíos ventiañeros o trentañeros gracies al so carné sindical y políticu… Esa ye la raíz del arcaísmu y esa ye la esquizofrenia asturiana y asturianista. Que se denomó “Izquierda” a una fedionda cosa nostra que nun tien nada que ver cola llucha de clases nin cola defensa del Pueblu Trabayador. Que se nomó izquierda a un Estatalismu pseudopaternal ya improductivu qu´esgonció pa siempres nuesa posibilidá d´autosuficiencia. La Esquierda que se reclama del “radicalismu” tendrá qu´alloñase enforma de los moos y les maneres d´esos tentáculos del Estáu Español que son CCOO y UXT. La nueva lliteratura asturiana, o ye identitaria o nun va ser más que´l cartuchu y la bala de cañón que primero van quemar los del Réxime, partidarios del estáu unitariu y enemigos de la cultura asturiana.
Ye´l momentu de trabayar col asturianu y, per aciu del asturianu, ye la hora de lluchar por que tengamos más conciencia identitaria, caún, yá sía d´izquierdes o de dereches. Ye´l momentu d´escaecer a los duernistes, a los paniaguaos, a los que quixeron faer de la nuesa lingua un preséu pa otros fines distintos al alitar d´ella mesma, distintos del alitar de la Nación. Ye´l momentu d´aperiar un Discursu a la Nación Asturiana. Que la lletra impreso, escrita dende la llibertá y la independencia de criteriu sía voz que faiga retemplar cimientos. Un Ensayu valiente, con vocación de definitivu, un apueste arrechu por recobrar la nuesa voz, el nuesu territoriu, la nuesa soberanía.
*** *** ***
Nun tenemos ensayu, y menos entá ensayu historiográficu que desendolque la nuesa especificidá.
a) Especificidá como ethnos que cuaya en Reinu.
El surdimientu políticu d´un estáu astur, l´Asturorum Regnum foi una consecuencia de la xeopolítica del momentu. La Península Ibérica nunca nun foi una unidá. Siempres foi un escenariu onde han ruemper dos frentes de foles: la fola mediterránea, que tantes veces chocó contra la muria cántabro-pirenaica, y la fola nórdico-atlántica, que conoz la so natural espansión hasta´l Dueru.
Los pueblos que xuben a caúna de les sos foles foron socesivos y, poro, estremaos. Pero´l fechu mesmu de xubir al fuerte barganaz xeopolíticu, el nun tener otro que facelo, yá-yos concede por necesidá unos rasgos comunes de calter, temperamentu, d´estilu y actividá.
Nestos escuros años d´inorancia y “Diálogu de les Civilizaciones”, la ciencia histórica hubo cadecer un gran caciplamientu col envís de favorecer ciertes opciones polítiques davezu teníes por progresistes. Un gran caciplamientu espárdese perdayuri. Escontra la opinión de los espertos, quier que nos creamos el cuentu de que l´avanzada mora que morriera en Cuadonga y Poitiers (o al menos qu´entamara a morrer y recular), fora una fola de civilización rellumante, d´esplandiente continuación de la Cultura Clásica énte los bárbaros que vivíen cristianamente (o nel Norte, como paganos entá) na Península . Non tal. Los bereberes recién islamizaos yeran la carne de cañón d´unos árabes que se llevaben a matar ente sigo pola mor de odios étnicos, y qu´odiaben por igual a los sos bárbaros (d´au vien “bereber”) recién reclutaos nel norte d´África. Arranaben la riqueza y rellumu de los godos, que sí yeren xunta Bizanciu la continuidá del Mundu Clásico. L´alta Cultura Isidoriana, los sos refinaos Conceyos, el luxu “asiáticu” de los nobles, obiespos, abades y Reis godos…too eso yera dafechu continuación de la decadencia del Imperiu Romanu Occidental. Ha tenese en cuenta que los Visigodos foron los menos bárbaros de los bárbaros y que´l so raigón xermánicu (tovía bultable en costumes y estétiques nel Reinu Tolosanu) yá taba bien dilíu al pasar a Toledo y al dir asimilando l´alta cultura hispanorromana na nuestra Península. Don José Orlandis señalaba cómo los Reis godos foron pasando de la so cenciella y austera imaxe de Caudiellos al vezu xermánicu, a la d´ hieráticos asonsoñadores del Emperador Bizantín, con ropaxes y diademes doraes nun Palatium que quería ser, en Toledo, la nueva Roma dafechu.
Pero esa monarquía decadente, basada en rellaciones sociales fondamente inxustes, ente esclavistes y protofeudales, taba destinada a cayer: xuntáranse les contradicciones internes cola invasión universalmente imparable del Islam. En Guadalete, un don Rodrigo al paecer inespertu y mui dáu a les “venaes”, como por exemplo al pelear ensin zorrería dalguna, a les braves, dexó d´escorrer vascones y baxó al Sur ensin planificación dala a xugáselo too una batalla, ensin afechiscar exércitos al llombu d´él por si acasu fracasaba en Guadalete. Pero ye qu´amás los Witizianos fixeron de “quinta columna” dexándolu solu nel precisu intre decisivu de la contienda.
Pero tovía hai más enfallos p´anotar: esi exércitu de “godos” taba formáu en realidá por una masa bultable de siervos qu´a la fuerza, y depués d´una esistencia mísere como esplotaos y faltos de llibertá, teníen que pelear por un Reinu que nada-yos daba a cambiu. Nun yera d´esperar munchu enfotu n´ellos a la hora de garrar les armes contra´l moru.
Esa monarquía tan desigual, inxusta, perpetuadora de los vezos mediterráneos basaos nel esclavismu, la gran propiedá, la servidume xeneralizada de grandes capes de campesinos, y l´acumulación tributaria en beneficiu de reis, nobles y xerarques eclesiásticos, esa, digo, yera bien fríngole coles armes, decadente (pues el luxu siempre fai al home decadente) y dimpuesta a pactar col diablu con tal de perpetuar los privilexos. A los pocos años de conquistada “España” los godos que nun colaron escontra tierra de los francos, yá taben faciéndose mahometanos. Y, ye curioso: d´esta castra quixo la Historia Oficial faer al Reinu Astur heriedu del Godu.
El Reinu Astur conoció una espansión per aciu de franxes cada vuelta más allonxaes del raigón inicial. Al rodiu de Cangues d´Onís yá esistiera un centru de poder que, al ser trubiecu del Reinu, pasó a denominase “Primories” (les Primeres). Había nes Primories un llugar sacru, la Cova Dominica, de munchu tiempu atrás sacralizáu, y que´l cristianismu hubo respetar y tresformar. El numen, seique una deidá femenina del tipu de la Deva celta, convirtióse en Virxe, la Ma de la Divinidá. Pero la presencia numinosa del agua, la cayida d´ésta pente les resquiebres de la peña, permiten suponer el calter precristianu d´una deidá femenina protectora o habitante del elementu acuáticu. La mesma Asturies precristiana ta fonderamente venceyad al agua, siendo proverbial la so bayura (milenta regatos, ríos caldalosos y rápidos, fontes peruquiera..).
Les Primories xuncíen Poder del Numen y Poder Políticu, siendo esti´l d'un cabezaleru militar aupáu, seique, sobre un escudu tres el preste que-y daba un conceyu popular de xente armao. La manera na que don Pelayo hubo ser aupáu como princeps quiciás nun anduvo tan estremada de la manera na qu´escoyeran a los xefes de guerra los astures de la dómina goda y aínda la romana, ye dicir, los astures pre-estatales. L´episodiu de la batalla de Cuadonga ha ser contestualizaú dientro la recatafila d´alzamientos y resistencies de los astures y cántabros a tou poder imperialista, poder que se traducía n´impuestos y perda de llibertaes pa estos pueblos. Y la esistencia mesma d´estes Asamblees de xente armao, inda d´un Senatus –documentao ente los cántabros de la dómina goda- permite suponer a los nuesos antepasaos como xente nórdica dafechu, enraigonada nel tueru celto-xermánicu, con unos usos y maneres que yá los visigodos del Reinu Toledanu teníen escaecíos pero que tamién compartieran unos pocos sieglos anantes de sufrir un aceleráu procesu de romanización ya hasta orientalización (pues estos Reis y les élites nobles godes yeran amigos del luxu, la riqueza y asonsañaben al Oriente cada vuelta más).
Yeren los astures y cántabros “pueblos n´armes”, democracies agonístiques daes a la matrilinealidá tocántenes a la tresmisión del poder. Esto quier dicir que´l varón guerreru ostentaba´l mandu en casu ser escoyíu, masque yera la fema la tresmisora de tolos derechos importantes y, nos primeros Reis astures, la tresmisora del poder rexiu. Esto yá de por sí atestigua la dignidá ya importancia del seutor femenín n´aquelles sociedaes xentilicies y guerreres, con resclavos d´instituciones de transición haza´l patriarcáu postreru que s´allongaba inda unes feches tan serondes como´l sieglu XII, ye dicir, nun mediu feudal tan roceanu o incompatible pa con elles.
Eses Primories, amás, yeran d´una singularidá bultable. Yera tierra de verdadera fusión y hermanamientu. Llar de los cántabros vadinienses, esti yera una ponte ente dos pueblos con mui poques estremancies étniques. Falamos d´un territoriu “oficialmente” cántabru” pero peñeráu de los astures perauquiera que se-y mire. El llinax pelaxianu y el cántabru del dux don Pedro, el pa del primer Alfonso, tuvieron qu´amestase equí. Dalgún día eses Asturies orientales, cola ponte de les Primories, volverán a descubrir que son hermanes nuestres.
b) Especificidá como ethnos (más) europeú énte la mestiza España.
Según cuenta Álvarez Junco, gran especialista nel tema de la formación histórica del inventu nomáu España, la situación de los reinos ibéricos, yá avanzada la Edá Media, yera la d´un “escándalu” pa la Cristiandá.
La tan cacarexada -polos social-progresistes de güei- “España de les trés cultures” (Islam, Cristiandá, Xudaísmu) nun yera vista entós, al norte de los Pirineos, como un paraísu de la tolerancia, precisamente, nin de la convivencia, nin de la “educación pala ciudadanía” y demás babayaes propies de socialistes. Non, que nun se dio talu paraísu. Más bien, soportábense les tres tribes de monoteístes a puerta cerrada al atapecer, o asesinábense en voz baxa, o odiábensen y redistribuíen roles productivos asegún les races y relixones vencedores y perdedores. Esto quier ofrecese anguaño como convivencia. El casu ye que los francos, los xermanos, los anglos, etc., cuando visitaben la península, llevábense les manes a la tiesta al ver cómo dellos “vicios” y costumes afrosemítiques afeutaben a los cristianos, y facien ver al restu los europeos, a los de la Civilización de la Cruz, que los reinos castellán y aragonés nun yeren dafechuy del so mesmu tueru. Que teníen cuasi más d´África y d´Oriente que d´Europeos y occidentales.
Les élites castellanes y, en menor midida, aragoneses, sabíenlo. Sintieron vergoña y distanciamientu del orbe –la Cristiandá- al que queríen pertenecer. Y, al empar, al tar feches básicamente de conversos (el sangre de l´alta nobleza y cleru yera d´aniciu xudíu mayormente), con tola típica mala conciencia de tou conversu, entamaron anaína los consabíos procesos inquisitoriales, la llimpieza étnico, de la que nuesa península foi pionera y cabezalera.
El gran antecedente del nazismu y de Hitler ta en Castiella y eso ye un secretu a voces na Europa trespirenaica. Equí nun lo cuenten alpenes los maestros y profesores d´institutu, bien por vergoña, bien por españolismu, pero sábese perdayuri. En dengún llau la represión del otru y la obsesión racial (la llimpieza del sangre) algamó les cotes de fanatismu ya irracionalidá que nestos reinos hispanos, precisamente remanaos por una nobleza y alto cleru que dicía testerona venir de los Godos pa tapecer, en realidá, el so tueru semíticu.
Los grandes filósofos xermanos del XIX, ensin disponer de los métodos actuales de la historiografía sabíen de too esto.
Schopenhauer manexaba cifres d´esterminiu de xudíos hispanos que s´aprosimen enforma a les de les matances “industrializaes” del nazismu alemán (cientos de miles en pocos años, daquella). Los autos de fe, les quemes masives de la “parte reprimida” d´un Yo Coleutivu que se quier espurgar y exorcizar, l´odiu inventáu al “estrañu inventáu” (el moru, el xudíu) formen parte de la psique coleutiva del castellanu y del español. Esi fanatismu dexó como consecuencia´l raseru intelectual más baxu que´l d´Europa, quiciás de los más baxos, pa bien de sieglos nel que tuvo que ver un amenorgamientu de la variabilidá xenéticoa deseable nuna población amenorgada poles fogueres y les espulsiones. La Inquisición española fizo una verdadera “selección de los menos aptos”, que son los que, poro, sobrovivieron. D´ehí la mediocridá reinante n´España, la paralís cultural y política en comparanza cola Europa más norteña que continúa güei y qu´amenaza con contaxar irreversiblemente a Asturies, que pocu tuvo que ver con too esto.
La heteroxeneidá étnica de Castiella y Aragón contrasta enforma cola gran homoxeneidá respeutiva d´Asturies. Ye cosa tamién la diferencia ente l´Alta y la Baxa Edá Media. El Reinu Asturianu altomedieval abrió puertes a los francos (El Camín de Santiagu, la inmigración de repobladores trespirenaicos, etc.). La estructura paleofederal del Asturorum Regnum resolvíase sofocando rebeliones (de los gallegos, de los váscones, y tamién de los “siervos”, ye dicir, posibles mozárabes o sureños descontentos). Nun se trataba de convivencia de cultures incompatibles atechaes baxo la xida del “Llibru” (Biblia, Corán) como na Castiella baxomedieval. Tratábase nel Norte de pueblos non mui estremaos ente si (astures y cántabros paecen étnicamente indistinguibles) suxetos entá a localismos y llealtaes tribales pero toos ellos de raigame “indoeuropea” ensembre, lo que sirvió de sida pal inventu ideolóxicu del neogoticismu. Tesis esta que nun se siente dicir, pero que ye preciso reivindicar dende´l nacionalismu astur.
Esi Reinu que s´aniciara con Pelayu, pero más bien con Alfonsu II, yera la nueva Gothia solo nel planu imaxinariu. Una Gothia que pal home medieval, pocu dau a distingos étnicos y sutilidaes antropolóxiques, significaba realmente lo que güei denomaríamos “indoeuropeu”. Dizse güei que´l neogoticismu yera pura propaganda señardosa de la Hispania Gótica perdida. Nun se cuenta que yera tamién la única manera disponible entós de marcar diferencies étniques ente los pueblos nórdicos conquistadores (astures y demás confederaos galaicos, vascones, etc.) y l´amestamientu complexu del Meridión, confesionalmente islamita. L´elementu góticu yera minoritariu y, amás, decadente. Pero yera -nel imaxinariu- la manera de marcar la llinde ente xentes, más alló de custiones de fe. Metonimia pura, tomóse una parte envede´l Tou. Con razón Hegel, nel entamu del sieglu XIX sabía yá del Arte Asturianu –na fas del Arte “Románticu” (Cristianu na so tTerminoloxía) – y tomábalu como un Arte de los Godos abellugaos n´Asturies, amosando más conocimientu de lo qu´estos “godos” representaron na Historia d´Europa (repito: godos como metonimia d´astures y cántabros, en puridá) mentes que los “tradicionalistes” castizos posteriores (Donoso Cortés y demás ayatolás españoles) inoraren dafechu´l papel decisivu del Asturorum Regnum).
El “fechu diferencial” del asturianu y de lo asturiano, naquelles dómines tan llonxanes, les de la Edá Media, yera pa entós l´ausencia dafechu de raigones morunos o xudaicos, la so blancura de piel, la falta de influxos mediterráneos, en fin, la d´encarnar una antigua y yá derrotada goticidá. Inventóse´l camín de Santiagu pa eso, precisamente. Pa facer saber quién tenía que ser vecín, amigu, pelerinu: El francu, el centroeuropéu, l´anglosaxón, l´eslavu, l´italianu…
L´Asturies Altomedieval yera más Europa que la Castiella baxo-medieval y moderna. En suma.
La derrota d´Asturies, y tamién de Lleón, al quedar como retagardia d´un Reinu fronterizu ya imperialista, Castiella, al quedar como un probe requexu y solombra de lo que fue, supunxo tamién una minusvaloración de so reinventáu (y falsu) goticismu. “Nobles” llegamos a ser como tópicu, sí, nobles de calter, pero probes énte los nobles arribistes y conversos del llanu mesetariu. “Blanques” y “roxes” nuestres moces, sí, pero válides pa dar llechi a los fíos de la nobleza castellana dominante qu´arranaba por ablanquecer. Una tierra verde y húmeda, sí, que nunca nun fue vista como la más europea del Reinu Castellán, sinón como la selva imprauticable de carbayos ya indíxenas, les “Indies” del Imperiu castellán que miraba d´asomase al Guadalquivir y al Mediterráneu, que naguaba por sustituir los esplendores de Roma y Córdoba, con celu fanánticu y fierro sangrín.
Que si fuimos una islla, dicen. Que si nun saliéramos de nuesos cordales, cuenten… Metáfores xeográfiques que tapecen la sorprendente homoxenidá étnica énte los astures en comparanza cola imperialista Castiella (España, vamos), esi “crisol” de pueblos, como gusten de decir los sos “castizos” y “cañís”.
/image%2F1486375%2F20170407%2Fob_3d7752_scale.jpg)
/http%3A%2F%2Fgaceta.es%2Fsystem%2Ffiles%2Fstyles%2Flarge%2Fprivate%2Fdom_pedro.jpg%3Fitok%3DRVbNizU7)
/image%2F1486375%2F20170126%2Fob_00af1f_vikings2x092x10b.jpg)
/image%2F1486375%2F20161120%2Fob_5661a4_index.jpg)