El retornu de la Guaxa. De tripartitos y satélites.

01/11/2011

De la mesma manera que cuando una persona diba quedando esglamiada dicíen que la taba chupando la Guaxa, políticamente a Asturies tuvo chupándola otra guaxa político-social. Amazcarada baxo la forma d'un réximen clientelar corruptu de carnés na boca y flota chiringuera que tolo invadía per dayures.

Esta guaxa preséntasenos güei en forma de tripartitu del duernu. Una alianza aparentemente contra natura pero que a poco qu'escarabiquemos nella vemos que nun lo ye migaya. El PPSOEIX ye la nueva apariencia d'esi enxendru que va dexando Asturies esturniada y escosa dafechu.

Pero quedar namás que nesti plantegamientu ye nun apreciar tolos matices. Porque inda hai más. Talu enxendru de tripartitu tien los sos satélites estraparllamentarios. D'una banda ta la izquierda bable-gaita y d'otra l'asturianismu personalista. Opciones dambes que, dempués de quedar arrequexaes nel escaezu tres les últimes elecciones, talo paez que namás que s'afayen truñendo contra'l nuevu gobiernu asturianu como si la única oposición y alternativa real al mesmu(el tripartitu del duernu) fuere una opción más deseable. Una manera de dar les últimes boquiaes nel mundu la política llamentable abondo.

Según avancen los acontecimientos y observando los movimientos que se vienen produciendo nes últimes selmanes, nun ye gota descartable que'l tripartitu del duernu trate de dar un asaltu al gobiernu asturianu en pasando les prósimes elecciones del 20N consiguiendo asina afitar esi réximen clientelar qu'entama a taramingar nos últimos meses col asaltu a dellos chiringos emblemáticos como pue ser el Niemeyer, por exemplu. Y esto nun habría ponenos un res de contentos, sinón de preocupanos a esgaya.

Porque anguaño la prioridá absoluta ye esmanganiyar dafechu'l réximen clientelar heredáu de les décades pasaes de gobiernu de la izquierda plural y satélites con beneplácitu de la derecha alcagüetera y conformista. Lo demás son fueos artificiales pa estelar a un personal perdespistáu que se mueve más por dogmes de fe y eslóganes tronaos que pol razonamientu posáu y críticu. Si esi réximen clientelar consigue remontar el vuelu gracies al llabor del tripartitu del duernu y col beneplácitu cómpliz de los bable-gaita y asturianismu personalista nun sé si esti vieyu país tendrá aliendu bastante pa pervivir nel futuru.

http://asturies.gugara.com/quasimodo/post/2011/11/01/el-retornu-de-la-guaxa-de-tripartitos-y-satelites