El Regresu al Mitu

El Regresu al Mitu

Colos mitos asturianos asocedió lo que, un sieglu enantes, yá-y pasare a los mitos xermanos y celtobritánicos: una degradación y una infantilización. Les criatures espantibles y grandioses de les vieyes relixones indoeuropees sapózáronse baxo´l caín del escaezu y del cristianismu, amazcaritándose de santos y personaxes bíblicos, seique camudando en demonios o “xente pequeño”. Teo pa min que fue Arthur Machen, escritor galés y, poro, “primu” nuestru, el que meyor desplicó nos sos cuentos esa degradación, esa maxa apotropaica (alloñamientu del numen pa protexese) que´l cristianismu y la civilización “del progresu” fizo sobre seres descomanaos, poderosos, sobre númenes que, en pallabres de Rudolf  Otto, yeran “tremendos y fascinantes”. Velequí los gnomos y elfos xermanos y escandinavos. Yá nel sieglu XIX y colos Grimm éstos entes son pequeñucos y simpaticones, como capaos y adaptaos al usu infantil: ye´l numen amazcaritáu de personaxe de cuentu infantil y en lleenda aldeana. Les fades del fairy tale victorianu, como enantes nos tiempos isabelinos y shakesperianos, son fades d´escasu tamañu, neñes bobines que durmen nes flores y cuasi paecen muñequines de Disney, de les que la Campanilla de Peter Pan podría ser bon exemplu. Pero nun me quito de la tiesta la idea de que la fada orixinal celtobritánica tá más cerca de la nuestra xana asturiana y siempres caltendrá un posu terrible, ambivalente, preternatural: una verdadera diosa inxerida na Natura. Muncho más cerca de la Fada celtoxermánica ta, na lliteratura de recién, el personax tolkinianu de Galadriel que toles fades del barrocu y el romanticismu inglés.

N´Asturies tamos yá más qu´avezaos a les ilustraciones tipu comic o d´edición infantil, que averen les xanes, al Nuberu, al Busgosu, etc. a un públicu infantil o “turísticu”, los nuestros mitos. Pa bien o pa mal yá cuasi les imáxenes que caltenemos nel subconsciente de los nuestros númenes llariegos son les de Berto Álvarez Peña. Pero esta inconografía cuasi oficial de los seres mitolóxicos astures tapez lo fundamental: el pasu d´una vieya relixosidá ancestral –estrada de seres terribles- a un universu “fééricu”, de dioses degradaos o de personaxes como de Disney o de tebeu xaponés. El consumismu nel campu la mitoloxía trái situaciones ridícules, como les de los andaluces o madrilanos qu´al cayer nun hotel rural del Principáu y garrar ellí los llibros como los qu´edita “Picu Urriellu” (mui valoratibles, per otra parte), piensen que nós, los asturianos del XXI, tovía creyemos en Nuberos, trasgos o diaños burllones. O polo menos de la xente que “vive perdida en aldeas”, como ye vezu nos turistes decir. Dalgo facemos mal nel asturianismu si nun mos tomamos la Mitoloxía en serio y nun tenemos un Tolkien qu´escriba n´asturiano faciendo por alicar la dignidá de los nuestros núemnes, masque sía cola metada de la xenialidá del escritor inglés.  Nun hai salvación de les naciones d´Europa si nun hai un regresu a la filosofía y al mitu. Asina de claro. Volver a los raigones y aprofitar les agües soterránies de la nuestra alma coleutiva.