El Mal Esiste

Velequí´l gran tapecimientu d´esta dómina: negar la esistencia del Mal. Ye tiempu, el de nueso, nel que se sostién que´l Mal, el demoniu, ta namás dientro del corazón de los homes, o ye productu subxetivu esplicable por desarreglos endocrinos, desaxustes neuronales, privaciones sociales, falta de ciñu paternu, maltratu infantil, la libido desnortiada... milenta causes psicobiolóxiques y sociales. Y si nun apurrimos los espedientes “comodín” (opresión burguesa, “violencia estructural”, y demás) pa desplicalo lo más avezao na nuesa época ye cayer nel relativismu: el Mal pa min ye´l Bien pa otros.

Pero non. El Mal ye una realidá tanxible, en medría, qu´aplipaya, que s´impón.

El valir de dellos de los escritores más xeniales de la “fantasía”, como J.R.R. Tolkien o H.P. Lovecraft consiste n´averanos -otra vuelta- al Mitu. La facultá mitopoyética yera talantada –pol gran Tolkien- como una sub-creación. El Gran Dios Creador y el pequenu home qu´escribe cuentos y remembra tradiciones y lleendes, fain sostancialmente una y la mesma cosa: crear y re-crear. Y estos actos (el “fágase” xenesíacu) son siempre´l llastir de la Belleza y la Verdá escaecies énte tantu Mal que s´esparde. Cuando el poeta xenial ye, en pures, un “creador” (poiesis), los más fonderos arquetipos, les imáxenes ancestrales esquiten haza fuera y reclamien lluz, reclamien esllendor ente tanta escuridá. La Guapura y la Verdá camuden en Lluz, en Bien énte un Mordor que toos sabemos qué formes foi alquiriendo nel seiglu XX (y pa siguir). Mordor fue la URSS y el III Reich. Mordor fue´l napalm, los clérigos chiítes, Guantánamo. Mordor son los neños “pervertíos” pola maquinina y el móvil y el guasap o como diañes se nome.

Sociedá de mases y americanismo, consumistes autómates, cada vez más con xeitu d´orco y modales de xentecaya. Oclocracia y Orcocracia, plebeyismu peruquiera... Pasaxes d´El Señor de los Aniellos, como la Cabalgata de los Rohirrim dica Gondor, nun bilten más que de lo más profundo de la herencia d´una raza. Tolkien, l´escritor llariegu y sele, pacíficu a más non poder, amante de los árboles, de la Comunidá, de la Tradición, de la Natura y de la Decencia, nun podía más que sentir les áscuares del sangre guerreru. Porque la guerra ye la terapia énte un Mal que s´esparde, y el que ye lleal y cenciellu (sicasí, el que ye un Sam Gamyi, esto ye un verdaderu patriota) nun tien medrana al Ánxel Cayíu, o sí que-y tien mieu pero revuélvese escontra él y toma la espada.