Manifiestu Rexonalista

Manifiestu rexonalista:

Sofitamos a FORO ASTURIAS

Consideramos que ye un partíu ASTURIANU, REFORMISTA y REXONALISTA.

Los problemes de la nación son fondos y graves. Tamos metíos nun furacu tan prietu y tarrecible que los que nél vivimos nun somos quién a pensar y actuar: tala ye la nuestra cascancia davezu. Pero inda siguimos vivos, inda caltenemos na herencia ancestral esi sangre y esi aldu de lluchadores. Estes fuertes muries, esa Cordalera qu´un día foron la cuenta pa defendese de pueblos estraños, imperialistes ya invasores, tamién son el dique de contención d´esa vagamar de corrupción, marafundio y clientelismu que vieno d´España. Maldá que s´añerara nella y enraigona en tol dominiu: al norte d´ella tamién. La corrupción y el clientelismu yá enraigonaron bien n´Asturies... Un mesmu pueblu qu´alzó armes a romanos, godos, islamites, castellanos… Un pueblu que s´enfrentó a Napoleón, un mesmu pueblu que dio trabayu, carbón y vides pa que la famienta España de Franco saliera p´alantre y s´industrializara.

Nun ye que se busque agora agradecimientu, simpatía, qu´arranemos el ciñu de naide. Búscase agora la recuperación de l´autoestima: querese nós mesmos ye l´entamu de toa recuperación.

Y ese autorreconocimientu supón:

1) Amar, usar y defender la Llingua Asturiana y l´eonaviegu (tamién llingua d´Asturies) dientro y fuera de les nueses fronteres, defendiendo sobre manera la Oficialidá del Asturianu y del Eonaviegu dientro del territoriu nacional.

2) Defender en tolos foros y ámbitos el calter nacional del nuesu país, nun permitiendo dengún menospreciu o arrequexamientu del mesmu dientro o fuera del Estáu, lo qu´implica defender con tolos medios democráticos al nuesu algame'l derechu al autogobiernu y la declaración pública y la revitalización de la nuesa antigua soberanía dende la llealtá a España y en oposición a tou nacionalismu separatista.

3) Lluchar contra´l despoblamientu del País y la so creciente colonización económica y cultural, naguando pola revitalización del campu, la distribución homoxénea de la población nel so territoriu y l´aplicación de polítiques xustes, igualitaries, solidaries y empobinaes a democratizar la economía asturiana.

4) Acabar coles agresiones medioambientales, llingüístiques, y toa triba de fenómenos aculturizadores.

5) Facilitar la unión de fuerces dafechu asturianes con FORO Asturias pa facer frente al programa sucursalista y colonialista que gasten los partíos anguaño dominantes n´España. Non al Tripartitu PPSOEIU

6) Emplegar tolos recursos de la ciencia social p´abrir nueves perspeutives al problema demográficu, económicu y territorial que cadez la nación asturiana.

7) Afalar el reconocimientu de la so asturianidá de toos aquellos territorios, grupos, o particulares que lo deseen, collaborando estrechamente con ellos.

Too esto ye lo que persiguimos. Y vamos a lluchar por ello.

¡Puxa Asturies! Más Asturies, Meyor España.