Lo rural

Rural

Lo rural opónse a lo urbano, y esta oposición foi un fechu de magar lo urbano domina y arrincona lo rural. Esta dominación y arrinconamientu de la vida rural anició nel Llevante o Prósimu Oriente, a fines del Neolíticu (la "revolución urbana") y aportó a la fastera cantábrica per aciu del Imperiu Romanu, y eso de forma serondiega y perprobe. Esti Imperiu foi un Estáu que, no sencial, yera una hipertrofia de la urbs romana. Los pueblos nórdicos d´Iberia (astures, cántabros, galaicos) sólo entraron pel aniellu de la vida urbana en fecha mui seronda y forciaos pola violencia romana.

El modelu de polis o urbs propiu de les civilizaciones mediterránies (púniques, heléniques, romanes) nunca nun cuayó y na Edá Media y Moderna Asturiana: cuasimente, namái Uviéu y Avilés calteníen un rangu de poblamientu ciudadanu metanes un País que yera, no fundamental, un ensame de villes y poles que formen, como bien desplica Xuan Xosé Sánchez Vicente: un sistema policéntricu qu´encadarmaba un campu (aldees, llugares, parroquies) orgánicamente vivíu (non namái trabayáu sinón tamién esfrutáu).

Lo rural y lo aldeano, baxo valores burgueses propios de la economía mercantil, acaben siendo territorios colonizaos pola urbe. L´asaltu a la identidá asturiana escomencipia por y coincide con l´asaltu a los moos y y vezos propios de la cultural rural asturiana. Ñegando drechos y servicios (sanidá, educación, cultura) a los habitantes del mediu rural, la urbe actúa como aperiu d´aculturación.

El capitalismu industrial y el xacobinismu centraliegu del Reinu d´España afalaron la emigración campu-ciudá, faciendo tolo posible por cuntar con una mano d´obra barata y bien localizada en núclios urbanos.Esa mano d´obra ensin raigaños nin preseos d´autosuficiencia en casu de güelga o desemplegu, siempres fue, ye y sedrá fácil de caciplar y esplotar. L´aculturación de la nación asturiana per aciu de vezos urbanistes a ultranza alquirió la forma ideolóxica, astrauta y utópica, del proletariáu "universal": un emigrante astur o d´otra fastera del Reinu (y, de recién, un emigráu llegáu de cualquier parte del mundu) que nada nun sabe de la redolada rural y de les tradiciones nacionales milenaries qu´aliten a pocos quilómetros de la so barriada o arrabalde urbanu, y que se va "movilizar" namái por ideoloxíes o "ídolos" igualmente universalistes: revolución proletaria, "drechos humanos", socialismu, antifacismu.D´esi proletariáu universalista clásicu (mineru, obreru fabril) vien el consumidor pseudoasturianu neto universalista o cosmopolita.

Nesti sen, l´ataque a la vida rural ye l´ataque a la nación asturiana y acaba alzándose como un pegoyu a lesideoloxíes universalistes qu´arrenieguen de la esistencia de patries, tradiciones, identidaes y la historia mesma, y canalicen les "lluches" y los porgüeyos coleutivos en pro d´entes abstractos, llonxanos y fantásticos (Humanidá, Progresu, Revolución) envede lluchar polo concreto y a flor de piel: la patria, la nación, lo comunitario, el propiu pueblu y la propia Casería.