Del "Pactu del Duernu" al "Tripartitu del Duernu".

Pero agora dieron un pasu cuantitativu y cualitativu estimable. Xunióse-yos un sociu nuevu y con ello yá podemos falar con tola propiedá de que tenemos n'Asturies un tripartitu: "El Tripartitu del Duernu". De resultes d'ello, tenemos tamién instaláu ente nós un sistema institucional clarísimamente bipartidista. D'un llau'l PPSOEIX y d'otru'l FAC.

L'oxetivu principal del nuevu proyeutu políticu duernista ye encontar y defender el réximen clientelar que tien una de les sos mayores representaciones nel ensame de chiringos que foi llevantando al traviés de los años. El nuevu gobiernu ta truñando contra tou esi entramáu y eso manca, resquema y fai peligrar el puestiquín seguru y afayadizu.

A la vuelta la esquina va haber elecciones d'ambitu estatal el 20N. Quiciabes de los resultaos qu'algame caún sirva pa que'l tripartitu dea'l pasu definitivu p'alantre de valtar al gobiernu autonómicu actual o non. La cuestión ta revesosa porque de nun lo facir y si lu forzare a convocar elecciones anticipaes correríen el riesgu de salir más escalabraos del eventu de lo que salieron nes anteriores autonómiques.

Entrín y non habemus bipartidismu, tripartitu del duernu y xente atrincherao nos sos chiringos dispuestos a dar la batalla por caltener los sos enchufes y privilexos. Tampoco nun ye d'estrañar. Un sistema corruptu hasta la cañamina como'l que tenemos equí y con unos raigones bien fondos echaos al traviés d'abondos años nun se desanicia tan fácilmente...

Fonte: El Gorrumbu´l Turrexón: http://asturies.gugara.com/quasimodo/post/2011/10/25/del-pactu-del-duernu-al-tripartitu-del-duernu