Sectarismu y reivindicación llingüística

Protestes a títulu individual por cuenta de les agresiones que PODEMOS/SOMOS d´Asturies cometió pa cola Llingua Asturiana sí lleímos dalgunes, pero a nivel organizativu namás que les lleímos n´Andecha Astur y en N´Ast. Nun mos cayó embaxu. ¿Ú tán les Xuntespoles y les Iniciatives pol Asturiano? Esto da la midida de lo que ye esti movimientu, el denomáu “asturianismu” atravesáu pol trastornu bipolar izquierda-derecha. Da la midida del calter falsu y cacipleru de les supuestes reivindicaciones pola identidá asturiana o pola Oficialidá. Metese colos d´enfrente, ideolóxicamente falando, pero azorronar colos que son de mio. Asina funcionen. Como en Podemos/Somos hai amiguinos, pues callo... El nacionalismu nun ye "tercer posición", a ver si s´enteren los magüetos. El nacionalismu nun ye una Ideoloxía, ye un amor a la Patria que ta pencima de toes elles.

N´Iniciativa pol Asturianu saben dar palos a Carlos Rubiera (nun entramos agora en si lo merez o non) pero nun abren la boca con tolo que ta pasando col Ripa, Tania, Mª Eugenia, etc. Si atacamos o censuramos, hemos facelo a toos. Y si non, que nun vayan d´"apartidistes", porque nun lo son.

El que ta muertu y bien enterráu ye esi fenómenu efímeru, pasaxeru, que s´encasquetó el nome d´"asturianismu". Una conciencia d´identidá, afitada nel cultivu d´una llingua propia, desixe separtase de los estremismos, de les parcialidaes, de los personalismos y, riba too, de los caciplamientos. El qu´unos supuestos "patriotes" den cola maza a unos "anti-asturianistes" (Carlos Rubiera) y, pela cueta, callen y azorronen énte otros que sí son represores inda antes de tomar un cargu (Podemos, Somos,etc), amuesa a les clares que nun hai País nin defensa organizada del mesmu.. Nun va haber Oficialidá. Nunca. La culpa tiénenla los propios "asturianistes". Yá nun hai asturianos como Acebal, y duelme porque nun-y damos al gran poeta unos más dignos homenaxeantes.