Un nacionalismu de güevos rotos.

El nacionalismu asturianu tien un filu conductor dende l’aniciu y que siempre actuó como un caleyu que lu llevaba al escentellamientu: la falta d’enfotu en sigo mesmu.

Ello fixo buscar siempre ayuri otra xente y otros colectivos nos que se sofitar. Comportándose neto a un cuquiellu poniendo’l güevu notru ñeru. Pero con resultaos llaceriosos porque esi güevu acababa siempre estrapáu en suelu.

Son abondos años empobinando per esa dinámica. Acuruxándose ensin confiar nes propies fuerces y buscando techu notros abellugos. Y’l resultáu ta ehí y llámase la nada. La invisibilidá social. El requexu. El paritoriu calamitosu de sigles nuna llista que yá abulta, cuantayá, tan macabra como ridícula.

Pa detrás esa estratexa foi desdibuxando les traces nacionalistes camudándoles por otres ayenes. Güei llamamos nacionalismu n’Asturies lo que nun ye más qu’una izquierda que s’espresa en “bable”. Y eso tien tanto de nacionalismu como una xata de pilotu d’aviones.

Estos díes talo paez que la parturienta siglera va dar a lluz otra sigla más a añadir a la yá perllarga enantes mencionada. Ye curioso. Nesti país cuando fracasa un proyectu la culpa nun ye de lo propuesto nin de los que lu enxareten, sinón de les sigles. Invéntense otres y too resuelto.

Señores, llegó la hora de decatase de que l’unicu camín ye tener fé nes propies fuerces, dexase de naguar pola ayuda ayena y concienciase de que la única sigla y proyectu posibles ye, precisamente, los que nunca nun se fundaron: un Partíu Nacionalista Asturianu.

http://cuquiellindelrei.wordpress.com/2012/05/10/un-nacionalismu-de-guevos-rotos-7/