El nacionalismu asturianu nació na segunda metá de los años setenta del sieglu pasáu. D'entós p'acá ye un fechu ciertu qu'hai nacionalistes asturianos. Yo conocí y conozo dellos. Dalgunos, llamentablemente, yá fallecíos.
Si hai daqué que naide nun pue cuestionar ensin mentir ye que los nacionalistes asturianos son demócrates. Sí se podrá dixebrar -y con tola razón- que los hai allugaos na izquierda política y nel interclasismu. Pero demócrates.
Otramiente, dende va un tiempu a esta parte rula per ende un discursu que cuestiona'l calter democráticu de los nacionalistes asturianos. Yá hai, incluso, hasta quien los tilda, con una tranquilidá pasmosa, de facistes, asina con toles lletres.
Y la historia d'estes tres décades de nacionalismu asturianu diz, clarísimamente, tolo contrario. Los nacionalistes asturianos tienen una buelga bien marcada tres de sigo de trabayu contra tou tipu de represión y negación d'Asturies y la so xente. Dende lo nacional, a los drechos y llibertaes ciudadanes, pasando peles cuestiones sociales. Esa buelga ta ehí pal que quiera parase a analizar los fechos.
Poro, que vengan anguaño a descalificar al nacionalismu asturianu aventando enriba d'él la puxarra de les calificaciones totalitaries y facistes nun se pue almitir de nenguna manera. Los qu'asina actúen incurren nel bilordiu, la mentira y la mayor falsedá. Y son auténticos peones de brega que sirven a los intereses del réximen clientelar, duernista y antiasturianu qu'hai asitiáu ente nós dende cuantayá.
El nacionalismu asturianu ye un de los movimientos que con más enfotu na defensa del país y de mayor llimpieza democrática se tien dao de magar la transición hasta güei. Otra cosa ye que nun fore a cristalizar n'opciones polítiques con brenga y espoxigue social, que nun lo fexo. Y nesta incapacidá p'afitase y crecer definitivamente sí qu'hai un bon filón pa l'autocrítica, la reflexón y la escoyeta de les alternatives más vidables y con posibilidá de guañar na sociedá asturiana.
Poro, si hai persones o grupos enfotaos en siguir turriando contra la xente que tien esti pensamientu y aneciando n'allugalo al llau del totalitarismu, habrá que pescudar de qué duernu comen y a qué intereses políticos escuros sirven. Porque, a lo meyor, nesti casu, sí díbemos atopar auténtiques sorpreses.
/image%2F1486375%2F20170407%2Fob_3d7752_scale.jpg)
/http%3A%2F%2Fgaceta.es%2Fsystem%2Ffiles%2Fstyles%2Flarge%2Fprivate%2Fdom_pedro.jpg%3Fitok%3DRVbNizU7)
/image%2F1486375%2F20170126%2Fob_00af1f_vikings2x092x10b.jpg)
/image%2F1486375%2F20161120%2Fob_5661a4_index.jpg)