Les fuerces pactu-duernistes preparen una ofensiva total

Taba cantao enantes de les eleiciones xenerales, pero de magar los resultaos yá conocíos el procesu d'asaltu al gobiernu asturianu entaina yá de manera imparable.

Les fuerces pactu-duernistes prepárense pa botar al gobiernu del FAC de la Xunta Xeneral. Pa ello van entamar la ofensiva dende dos frentes.

El primeru, torgar cualquier posibilidá d'exercer al gobiernu'l so llabor obligándolu a convocar eleiciones anticipaes.

El segundu, plantegar una moción de censura y sustituilu por otru gobiernu pactu-duernista. Güei mesmo'l cabezaleru d'IU, Jesús Iglesias, amosaba a les clares na prensa esta posibilidá ensin cortase un res.

Cuenten pa ello col entramáu de la tovía viva rede clientelar au s'axunten fuerces polítiques, sindicales, sociales y un importante noyu de currifueyes comunicativos onde destaquen la traenta RTPA-LNE-LVA. Magar el so pesu específicu nesti entramáu sía feble, la izquierda bable-gaitera tamién participaría d'esti llau de la batalla según tán dexando ver claramente dalgunos de los sos voceros.

Del otru llau ta'l gobiernu llexítimu asturianu salíu de les urnes el pasáu mes de Mayu y que nun paez que vaya a dexase arrollicar fácilmente, plantegando una resistencia trabada y revesosa de valtar.

Y la batalla entama yá mañana mesmo. Del resultáu d'ella vamos tener que siga abierta la posibilidá de desaniciar el vieyu réximen clientelar o qu'esti s'afite per un tiempu indefiníu.

Toca tar sollertes y escoyer en qué llau nos vamos allugar.

xEl Gorrumbu´l Torruxón:

http://asturies.gugara.com/quasimodo/post/2011/11/22/les-fuerces-pactu-duernistes-preparen-una-ofensiva-total