Entama una época política nueva.

De magar lo asocedío na estaya de la política nes eleiciones de mayu y nes caberes entramos nuna época política nueva n'Asturies.

La izquierda d'ámbitu asturianu dempués de trenta años nun foi a esctructurar un proyeutu con tiez y capacidá d'esporpollar dientro de la sociedá asturiana y a estes altures yá nun hai niciu nengún de que lo pueda facer. Nun van desapaecer, pero'l so llabor queda finxáu nel terrén minoritariu como únicu espaciu de subsistencia.

L'asturianismu personalista sumióse. Nun tien espaciu dalu porque los sos sofitos colaron dafechu pa les files foristes. Seique seguirán sopelexando los sos discursos personales, de xente mui concreto siempre, porque organizativamente nun aprucen niundes. Pero nada más.

Sólo queda'l FAC como fuerza con posibilidaes de xorrecer socialmente y d'allugase con fuerza nes instituciones cosa que güei yá tien conseguío. Pero eso nun quier dicir que pueda afitalo pal mañana. Si nun ye a iguar un discursu que seya quien a retener esi votu perhetereoxéneu que recibió hasta agora les coses puen camudar de sen y venir malos tiempos.

Dientro d'esta fuerza hai un llugar acutáu pal asturianismu. Dende elli hai posibilidaes de trabayar por algamar ciertos oxetivos algamables como desendolcar la Llei d'Usu o encontar los nuesos patrimonios etnográficu y monumental (arte asturianu), amás de puxar dientro del partíu pa que'l discursu políticu s'avere cada vez más hacia unos conteníos netamente asturianos. Xera u hai que filar perfino poque pa ello ye menester convencer a seutores mui importantes que d'asturianistes nun tienen un res, pero que de perdelos el partíu resentiríase enforma. Ser una opción seria de gobiernu requier unos equilibrios que s'apoyen na renuncia de tolos seutores qu'agora s'axunten nesi proyeutu a parte de los intereses de so. En resultancia, ponese en plan masimalista nestos primeros momentos d'andadura ye nun se saber asitiar correutamente.

Los ataques yá arrecien enforma. Del llau de les formaciones d'ambitu asturianu yá se ta viendo claramente qu'igual-yos da'l retornu del réxime clientelar nunos casos y notros sofiten y aplauden que torne esi réxime porque pa estos caberos lo importante ye la "izquierda" metafísica y idegalizada na que se mueven. Pero la so capacidá de facer dañu ye práuticamente nula polo que la meyor posición pa con ellos ye nun-yos prestar atención dala y nun perder dende esti momentu más tiempu en retruca-yos un res.

L'auténticu frente nel qu'hai que centrar toles fuerces ye'l formáu pol Pautu del Duernu. Ehí sí que ta'l problema porque tán enfotaes en recuperar el réxime corruptu y clientelar cola so bayura de chiringos del que tán prestosamente vivíen (y siguen viviendo que tovía nun ta desmanteláu). Tán nello y van lluchar axuntando fuerces pa valtar l'actual gobiernu del FAC. Los tiempos que s'avecinen van ser gafos, pero collaborar nel esbarrumbe d'esi antiguu réxime que tanto frayó durante abondos años a esti país paga la pena.

http://asturies.gugara.com/quasimodo/post/2011/11/25/entama-una-epoca-politica-nueva