El Peligru Esencialista

x Carlos X. Blanco

L´esencialismu ye siempres la peor salida ideolóxica pa un movimientu que puxe pol alicar nacional. L´esencialismu, la postulación d´unes estructures de calter, de personalidá coleutiva, de mou de ser étnicu o racial, ye un resclavu del sieglu XIX, una torga y un velenu pal desendolcu de la conciencia nacional, sía la que sía la nación que busque un carreru nuevu, un esconsoñar. La canal haza delantre de dellos grupúsculos que tenten de caltener secuestráu´l nacionalismu asturianu ye un camín a nenyure. Trátase de sustituyir toa xuntanza ente asturianos por una Butifarra del bable y la gaita que nun va sirvir más que pa char pa trás a miles de ciudadanos, de persones normales que, colos deos na ñarra y una sensación creciente de voltura, contemplen ablucaos el panorama. Que defendan privilexos pa los catalanes y vascos y los refuguen pa la xente d´Asturies.

El panorama ye que l´asturianismu –sópitamente- camudó en catalanismu. El panorama ye que les zunes del pasamontañes y del camudar montera por chapela compleméntense agora cola butifarra d´Artur Mas y d´Esquerra Republicana de Catalunya. Un Artur Mas y un Jordi Pujol fedorientos pol so esencialismu: a dambos lleí declaraciones falando de la “mayor europeidá” de Catalunya por pertenecer al Imperiu Carolinxu y al ámbitu francu, arreblagando pencima la historia del Asturorum Regnum. A esi partíu de les manes llargues y del marafundiu de perres públiques, gústa-y falar del “Restu España” onde, por supuestu, ameten Asturies siempre que se-yos entruga: una España que-y dicen africana y, poro, una Asturies africana. Esi esencialismu llingüísticu d´un partíu mediterrániu que, namás que por caltener llingua propia (y faen bien) yá se consideren un mundu separtáu nun ye de recibu. Sofitar esa independencia d´una rexón mediterránia dende Asturies ye como ser fulana y poner la cama. Pero a eso se dediquen los bablegaites. Yo nun toi d´alcuerdu, pero el pueblu asturianu, menos. Los bablegaites quedarán, xunto coles andeches de la butifarra, nel so sitiu afayaízu: nel escaezu.

Esencialismu llingüísticu d´una ERC que votó en contra del presupuestu pa la nuestra Academia d´una Llingua nun menos digna y nun menos llingua que la catalana. Esencialismu d´una “Europa de los Pueblos” onde soberanistes asturianos faen flirteos con toa triba d´enemigos de la nuesa nacionalidá. Esencialismu de los que defienden que´l pueblu asturianu ye única y esclusivamente “clase obrero”, como si viviéramos entá baxo la cérula del INI, d´HUNOSA, d´ENSIDESA, y como si tuviera partidarios entá el mitu esi del mineru dinamiteru que s´enfrentó a la a España “carpetovetónica”, y demás babayaes ensin xacíu y ensin gracia.

¿Quien escaeció a Belarmino Tomás? Yo, yo el primeru. Nun comparto esi racismu implícitu que supón que l´asturianu ye conxénitamente revolucionariu, obreru, antifacista y superior –dende nun sé qué podium del internacionalismu- a otros pueblos del mundu. L´almiración indisimulada haza los que paecen dar signos de fuerza contra la Constitución de 1978 (Bildus, Esquerras, y cía) demuestra una fisioloxgía y un psiquismu propiu de quien cadez impotencia, propiu de los eunucos ideolóxicos d´esta España tan confusa, tan falta d´organización y remocicamientu. Racismu y esencialismu nel asturianismu qu´hai que desterrar. Dellos, si pudieren, pidiríen nacionalizase vascos o catalanes de tantu auto-odiu que se tienen como asturianos, auto-odiu mal disimuláu con prexuicios etnicistes haza “cazurros”, “ejpañoles” (sic), etc. Les redes sociales amuesen un panorma murniu de lo que s´escuende tres les palabres valeres como “soberanismu”, “internacionalismu” o “solidaridá ente los pueblos”. Lo que s´escuende tres munchu activismu cibernéticu del radicalismu del bable y la gaita nun ye nada de nacionalismu, ye más bien un separatismu y un complexu d´inferioridá, morbos argutos y peligrosos ellos. Como nun tienen fuerza pa la “llucha armao”, axúntense a los hermanos mayores qu´amuesen un biceps insolidariu y supremacista. Yo, pela cueta, defiendo una “rebelión lleal dende les periferies”, una modernización del estáu español en pro del pluralismu y la unidá confederada, y denunciaré siempres esti esencialismu y racismu de los separatistes.