Contra´l totalitarismu y los prexuicios ideolóxicos

Arrinquemos el totalitarismu dende´l raigón pa facer que´l nacionalismu cuerra llibre de prexuicios decimonónicos. Pensar n´Asturies y nel so pueblu, na so lliberación ensin permitir nunca más qu´una ideoloxía o un sectarismu s´apropie de la identidá asturiana. Esta ye la meta, la prioridá absoluta de tou nacionalista asturianu: la rexeneración democrática del País y la preparación de nueves xeneraciones d´asturianos que manden a la pila cucho los eslóganes estériles, la simboloxía alloriada, la bipolaridá doctrinaria ente izquierda y derecha. Asturies y solo Asturies: volver al so campu, a la so natalidá recuperada, a la so fala y al so históricu territoriu. Que tornen los emigraos y que vuelvan les vaques a pacer nos sos praos. Asturies, una de les naciones más vieyes d´Europa, ye un país con xacíu, templáu y arguyosu... El victimismu y l´obrerismu tresnocháu yá vemos qué resultaos dan... El pueblu ta dando´l llombu a esi deliriu que caltuvo al nacionalismu secuestráu 30 años.

LA HEMIPLEXIA MORAL :

Personalmente creo que les ideoloxíes caduquen más ceo que les naciones y muerren antes que les propies conciencies d´identidá.
Ye por ello que, ensin arrenunciar a lo fundamental de la mio personal denuncia del capitalismu, creo que la bipolaridá izquierda-derecha ta sirviendo en forma pa dividir a los asturianos: tala "hemiplexia mental", como decía Ortega, obliga a posicionanos constantemente nun tarrén onde la llucha escapa al nuestru control y capacidá d´influyencia. Asturies ye una nación bien pequeña como pa tresformase nuna "tumba del capitalismu". L´Estáu Español tamién, ensin el conciertu d´Europa, ye tamién una roindá en términos de capacidá pa influyir nel cursu mundial de los acontecimientos. Como ciudadanos d´esi Estáu y d´Europa podemos tener milenta pareceres distintos sobre´l modelu de sociedá a mundial construyir, pero dellos de los que tamos nel grupu "Nin d´izquierdes nin de dereches: ¡Asturianos!" -yo polo menos- nun vemos a Asturies como una simplaya circunscripción alministrativa onde´l "pueblu" vaya a consiguir les sos reformes y meyores, inda les sos revoluciones. Ye afechiscar la Nación: Ye un pueblu, un paisax, un padremuñu, son unes llingües y unos vezos que nun morrieron en sieglos y sieglos d´escaezu, y naide les va a defender como nun siamos nós, los asturianos.
Los Valledores de turnu (siempre hubo Valledores dende´l sieglu XIV, en della midida y camudando la simboloxía) que llamen facha al que defiende la Nación riba too (como vistis "en direuto" los que sois amigos del mio perfil) nun me van a despistar yá nunca más. Pa min hai una llucha específica de los asturianos -non incompatible coles lluches y sueños de caún. Pero tenemos qu´iguar un espaciu d´alderique pa entamala, con xeitu, ensin les distorsiones y confusionismos totalitarios que, con orixe hispanu, aportaron al nuestru País. Esi totalitarismu de tolos que contestaron a los mios correos de convite a charrar: "non, porque soi d´izquierdes riba too". Esto amuesa una falta d´arrogancia y d´identidá descomanada. Y tamién detectamos una gran falta de preparación intelectual y cívica nes persones que pretendieron hasta agora lideral l´asturianismu ¡¡Cuántes persones "populares", que colapsen en númberu d´amigos del Facebook, son -en realidá- hemipléxicos mentales, taraos pa la vida cívica !! Taraos pa la vida cívica porque imponen condiciones iniciales pal diálogu. L´exorcismu d´un demoniu inesistente n´Asturies ("¡tu, facista!"), ye la señal inequívoca de que lleven el demoniu diento: en Psicoloxía eso llámase "proyección". Ven fuera´l totalitarismu que lleven consigo hasta llegar a la obsesión. Los qu´argumentamos y sabemos qu´hai una base social identitaria asturiaa que "pasa" d´ellos tenemos que nos empobinar a esa masa, ensin les corripies duernistes onde s´abellugaron los últimos 20 años..."