Una Asociación Nacionalista

Colos Partíos, nun hai manera. Ren de ren.

Nun me paez mala idea que los nacionalistes asturianos siamos quien a formar una Asociación Cultural, debidamente llegalizada, con estatutos, publicaciones, actes y rindición de cuentes. Una Asociación, nunca más un partíu. Una Asociación apartidista, onde caún tenga la ideoloxía que más-y pete, a manzorga, a mandrecha, nel centru, pencima o per baxo les ideoloxíes anguaño esistentes. Una Asociación que nun repita los erros de Conceyu Bable o de les qu´anguaño esisten, toes remanaes polos políticos y el politiquéu. Una xeremandía de patriotes que trescienda la especialidá o la zuna de caún. Non sólo Llingua. Non sólo Patrimoniu. Non sólo Historia. Non sólo Territorialidá. Non sólo Arqueoloxía, Mitos y Folclore. Non sólo… Una Asociación onde tengamos toos la nidia idea de formar parte d´una pervieya y noble Nación.

Nacionalismu nun ye “independentismu”. Nesta Asociación, entenderíase que ser independentista, federalista, autonomista o inda españolista ye condición personal de caún. Asturies ye pa min una nación atlántica, ibérica, hispánica y europea, too ello al empar, y nun veo incompatibilidaes importantes ente ser nacionalista asturianu y ser lleal a más entidaes supranacionales.

Nacionalismu nun ye “asturianismu”. Yá ta bien de pensar que cualisquier persona qu´escriba en llingua asturiana, el xéneru que sía, tenga de considerase automático nacionalista. L´asturianismu “políticu”, si tala cosa esistió dalguna vez, yá ta dientro de les Sucursales polítiques. Y asturianismu, que nun sé mui bien qué ye, nun ye nacionalismu.

Nacionalismu o ye plural, democráticu y arimáu al cultivu de les llingües propies, o nun ye.

Nacionalismu Asturianu nun ye “soberanismu” porque anque non toa España ye “tierra conquistao”, una parte sí lo foi per aciu del ancestru políticu nuestru, el Reinu d´Asturies, y les soberaníes de munchos reinos de “Les Españes” ye soberanía derivada (anque non menos llexítima por ello) de la soberanía astur, fontanal. Esto nun ye “Cuadonguismu”, sinón custión de primacíes temporales, d´orde xenéticu de les Soberaníes. Quiciás los catalanes necesiten o non un referéndum p´algamar o modificar la so Soberanía. Asturies yá tien una soberanía ab initio.

Nacionalismu Asturianu ye accidentalismu, neto, na custión “forma de gobiernu Estatal” (monarquía, república, confederación). Lo qu´ha importar ye la supervivencia y el bientar de la Nación Asturiana nel sen de les naciones hermanes de la nuesa contorna.

¿Qué vos paez esta propuesta?

(x Carlos X.)